ჩემთვის ძალიან დიდი პატივია, უკვე მესამედ წარვდგე თქვენს წინაშე, როგორც მერობის კანდიდატი. ამავდროულად ეს არის ძალიან დიდი პასუხისმგებლობა ჩემთვის. ძალიან კარგად მაქვს გათვითცნობიერებული, გააზრებული, რას ნიშნავს, იყო ქალაქის მერი, – განაცხადა დედაქალაქის მერმა და პარტია „ქართული ოცნების“ მერობის კანდიდატმა კახა კალაძემ.
მან ჯგუფ „ურსას“ კონცერტზე შეკრებილ პარტიის ახალგაზრდული ორგანიზაციის წევრებს მიმართა და აღნიშნა, რომ მას ახალგაზრდების მხარდაჭერის იმედი აქვს.
„2017 წლიდან მოყოლებული იმდენი კარგი საქმე გავაკეთეთ ჩვენი ქალაქისა და თბილისელებისთვის, რომ ნამდვილად არ მეშინია, მესამედაც ჩავერთო საარჩევნო კამპანიაში. არ მეშინია, რადგან პირველ რიგში, ზურგს მიმაგრებს თქვენი მხარდაჭერა, თქვენი თანადგომა. ძალიან ვაფასებ თითოეული თქვენგანის როლს“, – განაცხადა კალაძემ.
მისივე თქმით, თავისუფალი, განათლებული, განვითარებაზე ორიენტირებული ახალგაზრდები ქმნიან ქვეყნის მომავალს.