საქართველოში პირველად ევროპის ერთ-ერთი გამორჩეული კლუბის – AC Milan-ის საფეხბურთო ბანაკი – Milan Junior Camp გაიხსნა.
ვაკის რაიონში, ნუცუბიძის პლატოზე მდებარე თანამედროვე სპორტულ კომპლექსში ასაკობრივ ჯგუფებად დაყოფილი ადგილობრივი მოზარდები ერთი კვირის განმავლობაში, AC Milan-ის ოფიციალური პროგრამით, ინტენსიურ ვარჯიშებს გაივლიან.
საფეხბურთო ბანაკის გახსნას დედაქალაქის მერი კახა კალაძე საქართველოში იტალიის ელჩ მასიმილიანო დ’ანტუონოსთან და ფეხბურთის ფედერაციის გენერალურ მდივან დავით მუჯირთან ერთად დაესწრო.
„მნიშვნელოვანი დღეა იმ თვალსაზრისით, რომ მსოფლიოში ერთ-ერთი დიდი ისტორიის მქონე კლუბი ჩამოვიდა ჩვენს დედაქალაქში იმისთვის, რომ პატარებს, ახალგაზრდებს მოგცეთ შესაძლებლობა, ნახოთ, როგორია მილანური კლუბის ვარჯიშები, ტაქტიკა. ბავშვობიდან ამ ყველაფრის შეგრძნება მნიშვნელოვანია, მით უმეტეს, თქვენი ასაკის ბავშვებისთვის. მინდა, ვისარგებლო შემთხვევით და მადლობა გადავუხადო ყველა იმ ადამიანს, ვინც გაუწია ორგანიზება აღნიშნული საფეხბურთო ბანაკის მოწყობას. მადლობას ვუხდი იტალიის საელჩოს საქართველოში, ბატონ ელჩს მხარდაჭერისთვის, თანადგომისთვის. ასევე, ფეხბურთის ფედერაციას, ორგანიზატორებს, რადგან ძალიან მნიშვნელოვანია, პატარებს ჰქონდეთ შესაძლებლობა, მოირგონ ეს უმნიშვნელოვანესი შავ-წითელი მაისური. იცოდეთ, რომ ამ მაისურის უკან დგას ძალიან დიდი ისტორია. ეს არის კლუბი, რომელმაც მსოფლიოში მოიგო ყველაფერი, რისი მოგებაც შეიძლებოდა. ასე რომ, გამოიყენეთ ეს შესაძლებლობა. ერთი კვირის განმავლობაში იფუნქციონირებს აღნიშნული ბანაკი, ჩატარდება ორჯერადი ვარჯიშები. მინდა, გისურვოთ წარმატებები“, – განაცხადა კახა კალაძემ.
Milan Junior Camp-ში მონაწილეობას იღებენ 6-დან 15 წლამდე ასაკის ბავშვები. პროექტი პატარა ფეხბურთელებს უნიკალურ შესაძლებლობას სთავაზობს, შეისწავლონ ფეხბურთი უმაღლესი სტანდარტით, ჩაერთონ გუნდურ, დისციპლინებულ და მხიარულ პროცესში.
აღსანიშნავია, რომ საქართველოს „მილანის“ აკადემიის კოორდინატორიც ეწვია. პროექტის ფარგლებში, ქართველი მწვრთნელებისთვის ინფორმაციული ხასიათის სამუშაო შეხვედრა ჩატარდება. შეხვედრაზე სპორტის აღნიშნულ სახეობაში დასაქმებულ პირებს „მილანის“ აკადემიის მუშაობის სპეციფიკას გააცნობენ და საკუთარ გამოცდილებას გაუზიარებენ, რაც ქართულ საფეხბურთო სივრცეში AC Milan-ის მეთოდოლოგიის დანერგვას შეუწყობს ხელს.
საქართველოში პროექტის ორგანიზატორია Sports Corporation LLC. ახალი ინიციატივა 2024 წლის ე.წ. ლეგენდების მატჩის შემდეგ დაიბადა. პროექტი AC Milan-ის განვითარების გლობალური ხედვის ნაწილია. მისი მიზანია ადგილობრივი ფეხბურთის განვითარება, კლუბის ფასეულობებისა და გამოცდილების გაზიარებით.
ღონისძიებას მილანის აკადემიის წარმომადგენლები გიორგი ფოფხაძე და ლორენცო ჩიპრიანი, ასევე, მთავარი მწვრთნელი ფაბიო ვანონი ესწრებოდნენ.
