კანონით ყველას აქვს უფლება, რომ ნებისმიერი საკითხი გააპროტესტოს, მაგრამ ამასაც აქვს საზღვრები რა თქმა უნდა. არავის არ აქვს უფლება, რომ სხვას მიაყენოს შეურაცხყოფა. ასეთი კანონმდებლობა მოქმედებს ნებისმიერ თავმოყვარე ქვეყანაში, – განაცხადა პარლამენტის იურიდიულ საკითხთა კომიტეტის თავმჯდომარე არჩილ გორდულაძემ.
„ჩვენ ვიხილეთ, რომ გარედან დაფინანსებულმა „ნაციონალური მოძრაობის“ ტიტუშკებმა, რომლებიც პოზიციონირებენ, რომ თითქოს თავისუფლებისთვის იბრძვიან და რეალურად წარმოადგენენ ჩვეულებრივი მონური ფსიქოლოგიის ტიტუშეკებს, შეურაცხყოფები მიაყენეს არა მხოლოდ „ქართული ოცნების“ შტაბის თანამშრომლებს, არამედ რიგით გამვლელებსაც.
სალანძღავი სიტყვები, ბოთლების სროლა, რომელიც საზოგადოებამ კარგად ნახა, მომდინარეობდა დაორგანიზებული მართული ჯგუფებისგან, რომლებიც იღებენ ამ დავალებებს „კოლექტიური ნაცმოძრაობის“ წევრებისგან“, – აღნიშნა არჩილ გორდულაძემ.
კახა კალაძის საარჩევნო შტაბთან მომხდარ დაპირისპირებაზე, შსს-მ გამოძიება ჯგუფური ძალადობის მუხლით დაიწყო.
შენობასთან მისული აქტივისტები, შტაბში მყოფი პარტიის წევრებისა თუ მხარდამჭერების მისამართით სიძულვილის ენას იყენებდნენ და აგინებდნენ. დაუპირისპირდნენ ოფისში მომუშავეებს და მხარდამჭერ მოქალაქეებს, რაც მალევე ფიზიკურ კონფლიქტში გადაიზარდა. არსებული ინფორმაციით დაპირისპირების შედეგად დაშავდა ორი ჟურნალისტი.