“ჩვენ მივიჩნევთ, რომ საპარლამენტო პლატფორმა არის ძალიან მნიშვნელოვანი. ამიტომაც ვთქვით, რომ 2024 წლის არჩევნების დასრულების შემდეგ, შეცდომა იყო პარლამენტის მანდატების გამოუყენებლობა და ამას საზოგადოება აუცილებლად შეაფასებს”, – ამის შესახებ “გახარია საქართველოსთვის” პოლიტიკური საბჭოს წევრმა, ტატა ხვედელიანმა “ღამის კურიერის” ეთერში სტუმრობისას განაცხადა.
როგორც მან აღნიშნა, პარლამენტის თავმჯდომარისთვის საპარლამენტო მანდატების შენარჩუნებაზე მიმართვა სრულიად პროცედურული საკითხია.
“[პარლამენტის თავმჯდომარისთვის საპარლამენტო მანდატების შენარჩუნებაზე] მიმართვა არ წარმოადგენს არავითარ პოლიტიკურ ღირებულებას, ეს არის პროცედურული საკითხი. ვისაც საჯარო უწყებებში ჰქონია საქმიანობის გამოცდილება, დამეთანხმება, რომ ეს არის პროცედურული საკითხი, ის, რომ უბრალოდ მოხდეს შენარჩუნება ჩვენი სტატუსების. ჩვენ მივიჩნევთ, რომ საპარლამენტო პლატფორმა არის ძალიან მნიშვნელოვანი. ამიტომაც ვთქვით, რომ 2024 წლის არჩევნების დასრულების შემდეგ, შეცდომა იყო პარლამენტის მანდატების გამოუყენებლობა და ამ ამას საზოგადოება აუცილებლად შეაფასებს. ჩვენ არასდროს არ მოგვიტყუებია ჩვენი ამომრჩეველი, ყოველთვის ღიად ვსაუბრობთ ჩვენს პოზიციებზე, აქაც არაფერი არ არის მოსატყუებელი.
დღეს ჩვენ ვიმყოფებით პოლიტიკური ბოიკოტის პირობებში და არ ვცვლით ჩვენს გადაწყვეტილებას, ის მომდევნო 12 ადამიანი, ვისზეც მოხდა მანდატების მინიჭება, ვრჩებით პოლიტიკური ბოიკოტის პირობებში”, – განაცხადა ტატა ხვედელიანმა.