ჩვენი ამბიციური მიზანია, რომ ევროპის სამეულში დავიკავოთ ადგილი კორუფციის სიმცირის თვალსაზრისით, – ამის შესახებ საქართველოს პრემიერ-მინისტრმა ირაკლი კობახიძემ გადაცემაში „იმედი LIVE“ ეთერში განაცხადა.
მთავრობის მეთაურის თქმით, კორუფციასთან ბრძოლა ერთ-ერთი უმთავრესი პრიორიტეტია.
„კორუფციასთან ბრძოლა არის ერთ-ერთი უმთავრესი პრიორიტეტი ჩვენი გუნდისთვის. თვითონ ეს ფაქტი, ყოფილი მინისტრის დაკავება არის თავისთავად ძალიან სამწუხარო, თუმცა ჩვენ ვერ ვიქნებით ლოიალური კორუფციის მიმართ. ჩვენ გვაქვს ამბიციური მიზანი, რაც არაერთხელ გავახმოვანე, მათ შორის, როდესაც პარლამენტში ვაბარებდი ანგარიშს საზოგადოებას და პარლამენტის წევრებს – ჩვენი ამბიციური მიზანია, რომ ევროპის სამეულში დავიკავოთ ადგილი კორუფციის სიმცირის თვალსაზრისით.
უამრავი რამ გაკეთდა იმისათვის, რომ გაჯანსაღდეს სისტემა, მათ შორის, რამდენიმე დღის წინ საუბარი მქონდა იმაზე, რომ წლის ჭრილში 700 მლნ ლარი დაიზოგა მარტო სახელმწიფო საწარმოებში. ეს არის ენერგეტიკის სფეროში მოქმედი სახელმწიფო საწარმოები, განსაკუთრებით ელექტროსისტემა, „საქრუსენერგო“, სხვა საწარმოები, ეს არის საქართველოს რკინიგზა და სხვა სფეროებში მოქმედი სახელმწიფო საწარმოები. ჩვენ საკადრო ცვლილებებიც განვახორციელეთ, ასევე ინსტიტუციური ცვლილებები. წარსულში როგორც კეთდებოდა საქმე, ისე რომ გაკეთებულიყო, 700 მლნ ლარით მეტი დაუჯდებოდა ეს სახელმწიფოს. დამეთანხმებით, რომ ძალიან დიდი დანაზოგია.
ეს ფაქტებიც აჩვენებს იმას, რომ ზოგადად, ვზრუნავთ სისტემის გაჯანსაღებაზე და მეორე, წარსულში რაც მოხდა, დანაშაულები, ამის გამოვლენაც არის მნიშვნელოვანი იმისათვის, რომ ამ ყველაფერმა იქონიოს პრევენციული ეფექტი. როდესაც ჩნდება დაუსჯელობის სინდრომი, ბუნებრივია, ცდუნება იზრდება კორუფციასთან მიმართებით, ზოგადად, ნებისმიერ დანაშაულთან მიმართებით ასეა. აქედან გამომდინარე, ჩვენ გვჭირდება ეფექტური ზომების მიღება იმისათვის, რომ პრევენციაზე მაქსიმალურად ვიზრუნოთ“, – განაცხადა ირაკლი კობახიძემ.