ევროპარლამენტის პრეზიდენტს, რობერტა მეცოლას სურს თეთრმა სახლმა იცოდეს, რომ მისი მცდელობები, გავლენა მოახდინოს ევროპულ პოლიტიკაზე, სასურველი არ არის.
გამოცემა POLITICO-სთან ინტერვიუში მეცოლამ განაცხადა, რომ ევროკავშირი არ გამოხატავს პრეფერენციას იმის შესახებ, თუ ვინ უნდა გაიმარჯვოს აშშ-ის ნოემბრის შუალედურ არჩევნებში. თუმცა, აშშ-ის სახელმწიფო მდივანი, მარკო რუბიო მიმდინარე თვეში ბუდაპეშტში ვიზიტისას ვიქტორ ორბანის მხარდაჭერით გამოვიდა, უნგრეთის აპრილის საყოველთაო არჩევნების წინ.
„ეს არის საკითხი, რომელსაც ჩვენს ამერიკელ კოლეგებთან ხშირად განვიხილავთ – ისევე, როგორც ჩვენ არ ვეუბნებით მათ, თუ რა გააკეთონ ნოემბერში, ეს არის ის, რასაც ჩვენ მათგან სანაცვლოდ ვითხოვთ“, – განაცხადა მეცოლამ ლონდონში ვიზიტისას.
„მსურს, ევროკავშირის ყველა ქვეყნის მოქალაქეს შეეძლოს გადაწყვეტილების მიღება თავისუფლად და სამართლიანად, თავისუფალ და სამართლიან არჩევნებში. ეს ნიშნავს, რომ თუ დავინახავთ გარე ჩარევას, მანიპულაციას ან ამომრჩევლის ქცევაზე [ზეგავლენას], ჩვენ გვქონდეს ამასთან ბრძოლის ინსტრუმენტები“, – აღნიშნა ევროპარლამენტის პრეზიდენტმა.