თალიბანის ოფიციალური პირების განცხადებით, ავღანეთმა პაკისტანის არმიის პოზიციებზე ფართომასშტაბური სამხედრო ოპერაცია დაიწყო, რაც ისლამაბადის მიერ განხორციელებული ბოლო დარტყმების საპასუხო რეაქციაა.
დაჯგუფების მთავარმა სპიკერმა, ზაბიჰულა მუჯაჰიდმა განაცხადა, რომ ხუთშაბათს გვიან ღამით, საერთო საზღვრის გასწვრივ დაწყებული შეტევის შედეგად, „მრავალი“ პაკისტანელი ჯარისკაცი დაიღუპა, რამდენიმე კი ტყვედ ჩავარდა.
პაკისტანის ინფორმაციის სამინისტროში განაცხადეს, რომ „უმიზეზო ცეცხლს“ პაკისტანის უსაფრთხოების ძალები „დაუყოვნებლივი და ეფექტური პასუხით“ დახვდნენ. უწყებამ ასევე აღნიშნა, რომ ავღანურმა მხარემაც დიდი დანაკარგი განიცადა.
ეს მოვლენები მოჰყვა ისლამაბადის მიერ მიმდინარე კვირის დასაწყისში ავღანეთზე განხორციელებულ საჰაერო იერიშებს, რომლებსაც, თალიბანის მონაცემებით, სულ მცირე 18 ადამიანი ემსხვერპლა.