გიორგი მამარდაშვილის „ლივერპულმა“ ჩემპიონთა ლიგის მეოთხედფინალში ხვიჩა კვარაცხელიას „პარი სენ-ჟერმენს“ უმასპინძლა, 0:2 დამარცხდა და ორი მატჩის ჯამში ტურნირს გამოეთიშა.
პარიზში მოგებული პირველი მატჩის (2:0) შემდეგ, წყვილის ფავორიტად ფრანგული გრანდი მიიჩნეოდა. პლეიოფის საპასუხო მატჩი დაძაბული გამოდგა. ორივე ქართველმა ფეხბურთელმა შეხვედრა ძირითად შემადგენლობაში დაიწყო. პირველი სახიფათო მომენტი კვარაცხელიამ შექმნა, მამარდაშვილმა კი დარტყმა მოიგერია.
შესვენების შემდეგ „ლივერპულმა“ კიდევ უფრო დიდი ძალებით შეუტია და თამაშს აკონტროლებდა. პარიზელების კონტრშეტევაზე მამარდაშვილმა მასპინძლები კიდევ ერთხელ გადაარჩინა. თუმცა, 72-ე წუთზე ეს ვეღარ შეძლო – კვარაცხელიას გადაცემის შემდეგ, უსმან დემბელემ ანგარიში გახსნა, არბიტრის მიერ დამატებულ პირველ წუთზე კი კვარაცხელიას წამოწყებული შეტევა ისევ დემბელემ დააგვირგვინა.
ორი მატჩის ჯამში გაიმარჯვებული „პარი სენ-ჟერმენი“ დარჩა, რომელიც ნახევარფინალში მადრიდის „რეალისა“ და მიუნხენის „ბაიერნის“ წყვილის გამარჯვებულს დაუპირისპირდება.