ჩრდილოეთ კორეის სპორტული გუნდი, ბოლო 8 წლის განმავლობაში პირველად, სამხრეთ კორეაში გაემგზავრება. ჩრდილოეთ კორეის ქალთა საფეხბურთო კლუბი „ნექოჰიანი“ სამხრეთელ მეზობლებს აზიის ფეხბურთის კონფედერაციის (AFC) ქალთა ჩემპიონთა ლიგის ნახევარფინალში სათამაშოდ ეწვევა. სამხრეთში 27 მოთამაშე და სტაფის 12 წევრი ჩავა.
ამგვარად, კორეის სახალხო დემოკრატიული რესპუბლიკის სპორტული გუნდი სამხრეთ კორეაში ბოლო 8 წლის განმავლობაში პირველად ჩადის. ქალთა ფეხბურთისთვის ეს შესვენება კიდევ უფრო ხანგრძლივი – 12-წლიანი იყო.
მატჩი 20 მაისს გაიმართება. „ნექოჰიანი“ სამხრეთკორეულ ქალთა გუნდს, „სუვონს“ დაუპირისპირდება. მანამდე ეს გუნდები ტურნირის ჯგუფურ ეტაპზე უკვე შეხვდნენ ერთმანეთს და მაშინ ჩრდილოეთ კორეის წარმომადგენლებმა ანგარიშით 3:0 გაიმარჯვეს. თუ ისინი სამხრეთკორეელი მეტოქეების კვლავ დამარცხებას შეძლებენ, ფინალში გავლენ, რომელიც ასევე სამხრეთ კორეის ქალაქ სუვონში, 23 მაისს ჩატარდება.
საფეხბურთო კლუბი „ნექოჰიანი“ ფხენიანშია ბაზირებული და ჩრდილოეთ კორეის ქალთა უმაღლესი ლიგის 2021-2022 წლების სეზონის ჩემპიონია.