აშშ-ის ვიცე-პრეზიდენტმა, ჯეი დი ვენსმა დაიცვა პრეზიდენტ დონალდ ტრამპის პოზიცია იმის შესახებ, რომ ირანს ნება დაერთოს, შეინარჩუნოს თავისი ბალისტიკური რაკეტების ნაწილი. ვენსის არგუმენტით, ირანს ისინი „თავდაცვისთვის“ სჭირდება, ისევე როგორც ისრაელს აქვს თავდაცვის უფლება.
თეთრ სახლში გამართულ პრესკონფერენციაზე ვენსს სთხოვეს, განემარტა ტრამპის პოზიციის აშკარა ცვლილება ამ საკითხთან დაკავშირებით, იმის გათვალისწინებით, რომ აშშ მანამდე ირანის სარაკეტო პროგრამის განადგურებას ომის ერთ-ერთ მთავარ მიზნად ასახელებდა.
ვიცე-პრეზიდენტმა საუბარი იმით დაიწყო, რომ ბოლო ომის განმავლობაში აშშ-მა გაანადგურა ირანის რაკეტებისა და გამშვები დანადგარების „მნიშვნელოვანი ნაწილი“. „პრეზიდენტმა გუშინ მხოლოდ ის თქვა, რომ, რა თქმა უნდა, რეგიონული ქვეყნები არ თმობენ თავდაცვის უფლებას“, – განაცხადა ვენსმა.
„ისრაელი არ თმობს თავდაცვის უფლებას, თუ „ჰეზბოლა“ ისრაელის მიმართულებით რაკეტებს ან დრონებს ისვრის“, – განაგრძო მან. – „თქვენ ვერ ეტყვით ქვეყანას, იქნება ეს ისრაელი თუ ირანი, რომ მათ არ აქვთ თავდაცვის უფლება“.
მან განმარტა, რომ საბოლოო შეთანხმება, რომლის მიღწევასაც აშშ მომდევნო ორი თვის განმავლობაში იმედოვნებს, ითვალისწინებს ირანის თანხმობას, არ „აწარმოოს ისეთი ტიპის რაკეტები, რომლებსაც შეუძლიათ ფართოდ დაემუქრონ მთელ მსოფლიოს“.
„საბოლოო შეთანხმების ნაწილად, ჩვენ გვსურს, რომ ირანმა შეწყვიტოს რეგიონული არასტაბილურობისა და ტერორიზმის დაფინანსება და, რა თქმა უნდა, არ ეცადოს თავისი ბირთვული იარაღის პროგრამის აღდგენას“, – დასძინა მან.