პრეზიდენტის მოტივირებული შენიშვნები პარლამენტის ბიუროს ხვალ წარედგინება პრეზიდენტის მოტივირებული შენიშვნები პარლამენტის ბიუროს ხვალ წარედგინება. ბიუროს სხდომა 11:00 საათისთვის დაინიშნა, სადაც დეპუტატები პრეზიდენტის ვეტოსა და რიგგარეშე სხდომის ჩატარების საკითხზე იმსჯელებენ. წინასწარი ინფორმაციით კი, რიგგარეშე სხდომის გამართვა 26 ივლისისთვის იგეგმება.
გიორგი მარგველაშვილმა ვეტოს უფლებამოსილება პარლამენტის მიერ მიღებულ სამ კანონპროექტთან დაკავშირებით გამოიყენა. აქედან ერთი ”ადგილობრივი თვითმმართველობის კოდექსში” განხორციელებული ცვლილებების პროექტია, ხოლო ორი – ”საარჩევნო კოდექსთან” დაკავშირებული ორ სხვადასხვა კანონროექტი.
”ადგილობრივი თვითმმართველობის კოდექსში” განხორციელებულ ცვლილებთან დაკავშირებით პრეზიდენტ მარგველაშვილის მორტივირებული შენიშვნები 28 გვერდისგან შედგება. პარლამენტის მიერ მიღებული კანონპროექტის თანახმად, შვიდ თვითმმართველ ქალაქს, თელავს, ოზურგეთს, ზუგდიდს, გორს, ამბროლაურს, მცხეთასა და ახალციხეს თვითმმართველი ქალაქის სტატუსი ჩამოერთმევა და ისინი შესაბამის მუნიციპალიტეტებს მიუერთდება. შედეგად, ქვეყანაში, ნაცვლად 12 თვითმმართველი ქალაქისა, 5 თვითმმართველი ქალაქი დარჩება.
როგორც პრეზიდენტის მოტივირებულ შენიშვნებშია აღნიშნული, სახალხო სუვერენიტეტი, ემსახურება რა ხალხის ხელისუფლების განხორციელებაში მონაწილეობის უზრუნველყოფას და შედეგად, პირდაპირი, უშუალო დემოკრატიის რეალიზაციას, მმართველობის ყველა დონეზე უნდა განხორციელდეს. გიორგი მარგველშვილის შეფასებით, ეს უპირველესად გულისხმობს მოქალაქეთათვის ადგილობრივი ხელისუფლების ხელმისაწვდომობასაც.
”ხალხს უნდა ჰქონდეს გარანტირებული შესაძლებლობა, უშუალოდ ან წარმომადგენლების მეშვეობით გადაწყვიტოს საკუთარი პრობლემები, დაიცვას საკუთარი ინტერესები, უზრუნველყოს უფლებების რეალიზაცია. ამ თვალსაზრისით, ხელისუფლების განხორციელებაში პირდაპირი, უშუალო მონაწილეობა ადგილობრივ დონეზეა განსაკუთრებით ეფექტიანი”, – ნათქვამია პარლამენტისთვის წარდგენილ მოტივირებულ შენიშვნებში.
მასში ასევე აღნიშნულია, რომ რაც უფრო დიდია მუნიციპალიტეტი, მით უფრო ძნელია სახელისუფლებო ორგანოების გადაწყვეტილებებსა და ბიუჯეტში სხვადასხვა დასახლების პრიორიტეტული საჭიროებების მაქსიმალურად ადეკვატურად ასახვა. პრეზიდენტი მიიჩნევს, რომ რაც უფრო დიდია მუნიციპალიტეტი, მით უფრო იკარგება თვითმმართველობის იდეა, ადეკვატურად უპასუხოს ადგილობრივი მოსახლეობის პრობლემებსა და საჭიროებებს, ამიტომ თუკი მუნიციპალიტეტების გამსხვილება ხდება, მაგალითად, ევროპაში, ის ხდება მხოლოდ აუცილებელი მინიმუმის ფარგლებში.
გარდა ამისა, პრეზიდენტმა ვეტო პარლამენტის მიერ მიღებულ იმ კანონოპროექტსაც დაადო (ცვლილებები ”საარჩევნო კოდექსში”), რომელიც თვითმმართველი ქალაქებისა და თემების საკრებულოების ახლებურად ფორმირებას და საკრებულოებში მაჟორიტართა რაოდენობის გაზრდას ითვალისწინებს.
საარჩევნო კანონმდებლობაში განხორციელებული კიდევ ერთი ცვლილებების პროექტის თანახმად, რომელსაც გიორგი მარგველაშვილმა ხელი არ მოაწერა, პარტიების მიერ ცესკოს წევრების დანიშვნისა და მათთვის უფლებამოსილების შეწყვეტის წესი იცვლება. პროექტის მიხედვით, ცესკოს 6 წევრს ის პარტიები დანიშნავენ, რომლებიც საპარლამენტო არჩევნებში მონაწილეობის მიზნით რეგისტრირებული იყვნენ დამოუკიდებლად ან საარჩევნო ბლოკის მეშვეობით, რომლებსაც მიეკუთვნათ პარლამენტის წევრთა მანდატები და რომლებმაც შექმნეს საპარლამენტო ფრაქცია. პარლამენტის მიერ მიღებული კანონპროექტის მიხედვით, საარჩევნო ადმინისტრაციაში პარტიების მიერ წევრების დანიშვნა დამოკიდებული იქნება პარტიის მიერ ბოლო საპარლამენტო არჩევნებში მიღებული ხმების რაოდენობაზე, ნაცვლად დღეს არსებული წესისა, რომლის მიხედვით, საარჩევნო კომისიებში წევრის დანიშვნა დამოკიდებულია პარტიის მიერ სახელმწიფო ბიუჯეტიდან მიღებულ დაფინანსებაზე. არსებული წესისგან განსხვავებით, აღნიშნული ცვლილებებით, პარტიას საარჩევნო ადმინისტრაციაში ერთზე მეტი წევრის დანიშვნის უფლება ექნება.
როგორც პრეზიდენტი აცხადებს, ცესკოს დაკომპლექტების შემოთავაზებული რეგულაცია ვერ უზრუნველყოფს მრავალპარტიულ წარმომადგენლობას საარჩევნო კომისიებში, ვერ უზრუნველყოფს საარჩევნო ადმინისტრაციისადმი ნდობასა და არჩევნების მართვის პროცესში პოლიტიკურ პლურალიზმს. გიორგი მარგველაშვილი იმასაც აღნიშნავს, რომ წარმოდგენილი ცვლილებებით, ცესკოს დაკომპლექტებისას აღარ მოხდება ადგილობრივი თვითმმართველობის არჩევნების შედეგების გათვალისწინება, რითაც კნინდება მისი როლი და მნიშვნელობა.
პრეზიდენტი პარლამენტს სთავაზობს, დარჩეს უცვლელი ცესკოს დაკომპლექტების წესი და საოლქო და საუბნო საარჩევნო კომისიების წევრთა რაოდენობა.
პრეზიდენტი არც ცესკოს თავმჯდომარის არჩევის წესის შეცვლის ინიციატივას იზიარებას და პარლამენტს, მოტივირებული შენიშვნების სახით, ცესკოს თავმჯდომარის არჩევის წესის უცვლელად დატოვებას სთავაზობს.
ცნობისთვის, დღეს მოქმედი რედაქციის თანახმად, ცესკოს თავმჯდომარეს პრეზიდენტის წარდგინებით ირჩევენ ცესკოში, პარტიების მიერ დანიშნული წევრები (გარდა წინა საპარლამენტო არჩევნებში საუკეთესო შედეგების მქონე პარტიის მიერ დანიშნული წევრისა). იმ შემთხვევაში, თუ პარტიის მიერ დანიშნულმა წევრებმა თავმჯდომარე ვერ აირჩიეს, მას პარლამენტი ირჩევს. წარმოდგენილი საკანონმდებლო ინიციატივა ითვალისწინებს ცესკოს თავმჯდომარის არჩევას ცესკოს წევრების ორი მესამედის ან პარლამენტის მიერ. პრეზიდენტის შეფასებით, საარჩევნო ადმინისტრაციის უმაღლესი ხელმძღვანელის ცესკოს ორი მესამედით არჩევის შემთხვევაში არჩევის პროცესზე გაიზრდება მმართველი პარტიის გავლენა, რაც შედეგების ლეგიტიმურობას შეამცირებს.