კახეთის გუბერნატორი ირაკლი ქადაგიშვილი, რომელიც თელავში გახსნილ საგანგებო შტაბს ხელმძღვანელობს, აცხადებს, რომ თუშეთში ხანძარი ლოკალიზებულია. რაც შეეხება ართანის მიმართულებას, როგორც ირაკლი ქადაგიშვილმა გადაცემაში „დღის ამბები“ განაცხადა, ამ დროისთვის ცეცხლი ჩამქრალია. საგანგებო შტაბის ხელმძღვანელის თქმით, ამ ეტაპისთვის მიმდინარეობს დაკვირვების პროცესი და კონტროლდება აღნიშნული ტერიტორიები.
„თუშეთის მიმართულებით ხანძარი ლოკალიზებულია, მაშველები უშუალოდ მუშაობენ ახლა იმ ეპიცენტრებში საიდანაც ხანძარი დაიწყო და ლოკალიზაციის მაღალი ხარისხი გვაქვს მიღწეული.
ახლა ფაქტობრივად თუშეთში დაკვირვების რეჟიმში ვართ გადასული, რომ სადმე ნაკვერჩხლის საშიშროება ან რაიმე აალების საშიშროების კერა თუ არსებობს, მისი განეიტრალება მოხდეს. ცეცხლი, როგორც ასეთი თუშეთში ამჟამად უკვე ჩამქრალია. მთელი პერიმეტრი და დისლოკაციის ადგილი ცოცხალი ძალის მიერ კონტროლდება. აქ პირდაპირ ვიზუალურ კონტროლთან გვაქვს საქმე. რაც შეეხება, ართანის მიმართულებას – ალპურ ზონაში ცეცხლი ჩამქრალია, იქაც დაკვირვების რეჟიმში ვაგრძელეთ მუშაობას, რომ დღის განმავლობაში მაღალი ტემპერატურის გამო, ხელახალი აალების რეციდივი არ მოხდეს, მაგრამ ცეცხლი იქ აღარ არის.
ჩვენი ძირითადი ძალები, განსაკუთრებით ხაზს ვუსვამ, ცოცხალი ძალა, იქ რთულად მისასვლელ ციცაბო რელიეფზე მუშაობენ. ბარით ხდება მიწის გადატრიალება და ცეცხლის კერების ასე ლოკალიზება… ამის პარალელურად ვერტმფრენები დაწვირილებით ოპერაციას ახორციელებენ. მაგრამ ვიმეორებ, უმნიშვნელოვანესია სწორედ ცოცხალი ძალის მუშაობა ადგილზე.
გეტყვით, რომ საჯარისო ნაწილები ჯერჯერობით არ არის გამოყვანილი, რადგან ახლა ამის აუცილებლობა არაა. მოკლედ ყველა ის ძალა, რომელიც შინაგან საქმეთა სამინისტროს ქვედანაყოფებს, სტურქტურებს, სატყეო მეურნეობას, ადგილობრივ მოხალისეებს, ოღონდ მომზადებულებს – ეს ძალები ჯერჯერობით საკმარისია იმისთვის, რომ ცეცხლის ამ კერებს ვებრძოლოთ. თუ ჩვენ დავინახავთ მიმდინარე მუშაობის განმავლობაში, რომ რაიმე სხვა ტიპის დახმარება დაგვიჭრდება, ამ შემთხვევაში შტაბი, რა თქმა უნდა, დასვამს ამ საკითხს მთავრობის წინაშე და მთავრობა მიიღებს შესაბამის გადაწყვეტილებას. ვიმეორებ, ამ ეტაპზე ის ძალები, რომლებიც აქ არიან მობილიზებული საკმარისია იმისთვის, რომ დასახული ამოცანები შეასრულოს“, – განაცხადა ირაკლი ქადაგიშვილმა.