საქართველოს შინაგან საქმეთა სამინისტრო განცხადებას ავრცელებს, რომელშიც საპოლიციო კონტროლის ფარგლებში მომხდარ 2 ფაქტზე ამახვილებს ყურადღებას. კერძოდ, კახეთში, სოფელ ქისტაურში საცხოვრებელ სახლში ჩატარებულ დათვალიერებაზე და პოეტ ზვიად რატიანის დაკავებაზე.
“გვსურს გამოვეხმაუროთ 2 ფაქტს, რომელმაც საზოგადოების მხრიდან ინტერესი გამოიწვია.
პირველი ფაქტი ეხება, კახეთში, სოფელ ქისტაურში მოქალაქის საცხოვრებელ სახლში ჩატარებულ დათვალიერებას. კერძოდ, 2017 წლის 21 დეკემბრის თელავის რაიონული სასამართლოს N 11/ბ -1394-17 განჩინების საფუძველზე, 2017 წლის 22 დეკემბერს მოხდა მოქალაქის საცხოვრებელი სახლის და მიმდებარე სათავსოების დათვალიერება. ცნობილი გახდა, რომ შემოწმების დასრულების შემდეგ, დღის ბოლოს, ოჯახის ერთ-ერთი წევრი ქალბატონი გახდა შეუძლოდ. იგი გადაიყვანეს ინგოროყვას სახელობის სამედიცინო ცენტრში. ფაქტზე, შინაგან საქმეთა სამინისტროს გენერალურ ინსპექციაში მიმდინარეობს მოკვლევა.
რაც შეეხება მოქალაქე ზვიად რატიანის დაკავებას, შინაგან საქმეთა სამინისტროს გენერალური ინსპექცია სწავლობს ამ ფაქტს. პირველადი შესწავლის შედეგად, იკვეთება ორივე მხარის პასუხისმგებლობა. ამავე დროს, წინასწარი მოკვლევით იკვეთება ერთ-ერთი პოლიციელის შესაძლო სამსახურებრივი გადაცდომა. შინაგან საქმეთა სამინისტრო, ფაქტის საბოლოო გამოძიებამდე უფლებამოსილებას შეუჩერებს ამ პოლიციელს.ზვიად რატიანი ამჟამად გათავისუფლებულია დროებითი მოთავსების იზოლატორიდან. ამ ფაქტთან დაკავშირებით გამოძიება გრძელდება.”– ნათქვამია განცხადებაში.