თბილისში, ვერცხლის ქუჩაზე, ვეგეტარიანულ კაფეში მომხდარი ინციდენტის ფაქტზე შსს-მ სსკ-ის 125 მუხლით გამოძიება დაიწყო.
ამ დროისათვის გამოიკითხნენ შემთხვევის მომენტში ბარში მყოფი პირები. ასევე გამოიკითხება მეორე მხარეც.
შეგახსენებთ, რომ სოციალურ ქსელში მომხდარი ინციდენტის შესახებ ინფორმაცია ერთ-ერთმა თვითმხილველმა გაავრცელა.
როგორც ნინო ანთაძემ ფეისბუქის საკუთარ გვერდზე გამოქვეყნებულ სტატუსში აღნიშნა, ვეგეტარიანულ კაფეში 10 პირი შეიჭრა.
“მივედი კივიში, ვერცხლის ქუჩაზე ძაან საყვარელი და გემრიელი ვეგეტარიანული კაფეა. შევუკვეთე 2 ბურგერი და 2 ლიმონათი, დავჯექი და ველოდებოდი ანას, თან ანიმაციური ფილმი გაუშვეს კედელზე და ვუყურებდით… იყო სიმშვიდე და კარგი სიტუაცია. ამ დროს კაფეში შემოვიდა ნაცისტური დაჯგუფების 10 *ლე და შემოყარეს კაფეში სოსისები, შამფურით მწვადები და დაიწყეს ხმამაღლა ყვირილი.
ბარმენმა და მიმტანმა ერთხელ, ორჯერ, სამჯერ უთხრეს, გაჩუმებულიყვნენ ან გასულიყვნენ გარეთ. ატყდა შეხლა-შემოხლა, დანების ტრიალი, მზარეულს გაუხეთქეს წარბი, დაასისხლიანეს, მიმტანი გოგო ითრიეს თმებით, აფეთქდა მაშხალები, მოვარდნენ მეზობლები, რომლებიც მოითხოვდნენ სიწყნარეს და სულ ფეხებზე ეკიდათ, ვინ იყო მართალი. ვიღაც აივნიდან გამოდგა და ჰაერში ისროდა! იმედი მაქვს, გაზის იარაღით… მოვიდა პატრული, 10 *ლე უკვე გაქცეული იყო… პატრულმა, იმის გამო, რომ ბარში მომსახურე პერსონალს და სტუმრების უმეტესობას პირსინგები, დრედები და იროკეზები ჰქონდა, ჩათვალა, რომ ჩვენ ვიყავით კონფლიქტის ინიციატორები. 2 კამერაა იქვე და იმედია, ნახავენ ჩანაწერს და გაიგებენ, რაც მოხდა. მოკლედ, ყველაფერი საშინელება გამიგია ამ ქვეყანაში, მარა – ხორცს რატომ არ ჭამ, ბიჭოოო? – ეგეთი აღარ გამიგია! – ხორცს რატომ არ ჭამ, ბიჭოოო? მოდი, მიკბინე, მიკბინეეე! – 13 წელია ხორცი არ მიჭამია, მარა ასეთი არ გამიგია და რა ვქნა”, – წერს ნინო ანთაძე.