შალვა ხუციშვილი – ნებისმიერი მასშტაბის ტყის ხანძრისთვის მზად ვართ

საგანგებო სიტუაციათა მართვის სამსახურის უფროსის მოვალეობის შემსრულებლის შალვა ხუციშვილის განცხადებით, საგანგებო სიტუაციების მართვის სამსახურმა მთავრობის მიერ გაზრდილი ბიუჯეტის ფარგლებში 40-მდე ავტომობილი შეიძინა.
მისივე განმარტებით, 40 ავტომობილიდან 20 განკუთვნილია ტყის ხანძრებისთვის.
„საგანგებო სიტუაციების მართვის სამსახურმა მიიღო სახანძრო მანქანების პირველი ნაკადი, რომელიც მთავრობის მიერ გაზრდილი ბიუჯეტის ფარგლებში, დიდი შესყიდვის წესით შევიძინეთ.
სულ შეძენილია 40-მდე ავტომობილი, აქედან 20 არის ტყის სახანძრო ავტომობილი და რესურსი სრულად ფარავს იმ საჭიროებას, რაც გვაქვს ტყის ხანძრებთან დაკავშირებით. დამატებით შევიძინეთ ავტომობილები, რომელიც ასევე განკუთვნილია ხანძრებისთვის, როგორც წყლის გადასატანად, ასევე ადამიანების გადასაყვანად.
ნებისმიერი მასშტაბის ტყის ხანძრისთვის ვართ მზად. დამატებით, ევროპელი და ამერიკელი პარტნიორებისგან წელს ცხრა სახანძრო ავტომობილს მივიღებთ, რომელიც ასევე გაზრდის ჩვენს შესაძლებლობებს. ესაა ტექნიკის განახლების პირველი ეტაპი და მომავალი წლიდან უფრო მასშტაბურ ხასიათს მიიღებს განახლების პროცესი. ავტომობილების შეძენას 13 მილიონი მოხმარდა“ – აცხადებს შალვა ხუციშვილი.
შეგახსენებთ, რომ საგანგებო სიტუაციების მართვის სამსახურმა 20 ახალი სახანძრო მანქანა შეიძინა. საგანგებო სიტუაციების მართვის სამსახურის ინფორმაციით, მაღალი გამავლობის მანქანები ტყის ხანძრებისთვის არის განკუთვნილი და მისი მთავარი უპირატესობა მოძრაობაში ცეცხლის ქრობაა.
პირველი ეტაპზე საქართველოში 6 სახანძრო მანქანა შემოვიდა, რამდენიმე კვირაში საქართველოს საზღვარს დამატებით 14 ახალი ტყის სახანძრო მანქანება გადმოკვეთს.
საგანგებო სიტუაციების მართვის სამსახური ახალ მანქანებს იმ ქალაქებში გადაანაწილებს, სადაც ტყის ხანძრების მაღალი რისკი არსებობს.