“წინასაარჩევნოდ რბილ ძალასთან ერთად რუსეთი საქართველოს ტერიტორიაზე სამხედრო კომპონენტსაც ააქტიურებს. ოკუპირებულ “სამხრეთ ოსეთის” ტერიტორიაზე მასშტაბური სამხედრო სწავლება დაიწყო, რომელიც 16 სექტემბრამდე გაგრძელდება. კავკასიოლოგები არ გამორიცხავენ, რომ ეს რუსეთის მხრიდან რაღაცის სამზადისიც იყოს. აღსანიშნავია, რომ რუსეთის სამხედრო-ადმინისტრაციული ერთეულის, სამხრეთ ოსეთის სამხედრო ოლქის პრესსამსახურის ინფორმაციით, ერთდროულად შვიდ პოლიგონზე დაწყებულ სწავლებაში მონაწილეობს ოლქის სარაკეტო და საარტილერიო ჯარების 5 000-ზე მეტი სამხედრო”, – წერს გაზეთი “რეზონანსი” სტატიაში სათაურითრას გვიმზადებს რუსეთი წინასაარჩევნოდ “სამხრეთ ოსეთში” / “ხდება სერიოზული ძალების კონსოლიდაცია არა მხოლოდ კავკასიაში, არამედ – უკრაინის საზღვართანაც”.
“სწავლებაში ჩართულია სარაკეტო კომპლექტები: “ისკანდერ-მ”-ი, თვითმავალი ჰაუბიცები “აკაცია” და “გვოზდიკა”, ზალპური ცეცხლის რეაქტიული სისტემები “გრადი”, “ტორნადო გ”, “ურაგანი”, ტანკსაწინააღმდეგო სარაკეტო კომპლექსები “შტურმ-ს”-ი და სხვა. სწავლებაში მონაწილეობენ, როგორც ოკუპირებულ ტერიტორიაზე დისლოცირებული სამხედროები, ისე ჯარისკაცები ჩრდილოეთ კავკასიიდან. ცნობისთვის, საქართველოს ოკუპირებულ რეგიონებში – აფხაზეთსა და “სამხრეთ ოსეთში” რუსეთი წვრთნებსა და სამხედრო სწავლებებს პერიოდულად ატარებს. “სტრატეგიული კვლევების კავკასიური ცენტრის” ხელმძღვანელ მამუკა არეშიძის თქმით, ესეც მორიგი გეგმიური წვრთნებია, თუმცა იგი არ გამორიცხავს, ეს ასევე კავშირში იყოს გეოპოლიტიკურ პროცესებთან. “ევროპული დემოკრატების” ლიდერი პაატა დავითაიაც “სამხრეთ ოსეთში”მიმდინარე წვრთნებს ბუნებრივად მიიჩნევს, თუმცა არ იცის, როგორ განვითარდება მოვლენები”, – აღნიშნავს გამოცემა.
“ერთი მხრივ, ეს მანევრები არის გეგმური და ყოველ წელს ტარდება, მაგრამ, მეორეს მხრივ, 2008 წელსაც ასეთ წვრთნებს ატარებდნენ და რით დამთავრდა ეს ამბავი, ყველას გვახსოვს. ეს წვრთნები საქართველოში მიმდინარე პროცესებთან პირდაპირ კავშირში არ არის, მაგრამ, დარწმუნებული ვარ, ეს კავშირშია იმ პროცესებთან, რომლებსაც გეოპოლიტიკური პროცესები ჰქვია. გეოპოლიტიკური ცვლილების ფორმატში ვცხოვრობთ, ბევრი რამ იცვლება, ძველი კავშირები იმსხვრევა, თან ნელდება და ახალი კავშირები იქმნება, აქედან გამომდინარე ვფიქრობ, ეს წვრთნები ამასთანაა კავშირში. წვრთნების გარდა ხდება სერიოზული ძალების კონსოლიდაცია არა მხოლოდ კავკასიაში, არამედ უკრაინის საზღვართან”, – აცხადებს გამოცემის კორესპონდენტთან საუბრისას მამუკა არეშიძე.
“როდესაც რუსეთი ასეთ ნაბიჯებს დგამს, სამეზობლო ყოველთვის ეჭვით შეჰყურებს ამ ამბავს და ახლა არის ზუსტად ასეთი ვითარება. თან უნდა გავითვალისწინოთ, რომ რუსეთი ყველანაირად ცდილობს, თავისი გავლენა გააძლიეროს შავი ზღვის აკვატორიაში. განსაკუთრებით მას შემდეგ, რაც რუმინეთში ნატოს შესაბამისი სარაკეტო კომპლექსები განლაგდა. ამიტომ წვრთნა შეიძლება ასევე დამთავრდეს გარკვეული ექსცესით, – კაცმა არ იცის რა მოხდება. ექსცესებში საქართველოს წინააღმდეგ სამხედრო აგრესიას არ ვგულისხმობ, ამის საბაბი არ არის. რუსეთი სხვა მეთოდებით ცდილობს საქართველოს პოლიტიკურ თუ საზოგადოებრივ სიბრტყეში შემოჭრას და საკმაოდ წარმატებითაც. ამიტომ საქართველოს წინააღმდეგ სამხედრო აგრესიას არ ვგულისხმობ. დღეს რუსეთს ძალის დემონსტრირება სჭირდება სამხრეთ კავკასიაში იმისთვის, რომ მიაღწიოს თავის მიზნებს ახლო აღმოსავლეთის ზოგიერთ ქვეყანაში, მაგალითად სირიაში. არ არის გამორიცხული, რომ ეს უკრაინის მოვლენებთანაც იყოს მიბმული. რუსეთი ცდილობს გაძლიეროს თავის გავლენა მთელ პერიმეტრზე, როგორც ჩრდილოეთით და სამხრეთით, ისე დასავლეთით. ერთადერთი მიმართულება აღმოსავლეთია (ჩინეთი), რომელიც უყურადღებოდ აქვს მიტოვებული“, – დასძენს არეშიძე.
“პირველ რიგში, თქვენ თუ გადახედავთ ყველა არჩევნებს, რაც საქართველოში ტარდება, ნახავთ, რომ ყოველი არჩევნების წინ აფხაზეთსა და ცხინვალის რეგიონში რუსები მასშტაბურ წვრთნებს იწყებენ. ეს ჩვეულებრივი მოვლენაა, თუმცა რუსეთი, როგორც პროვოკატორი ქვეყანა, ყველაფერს აკეთებს ამისთვის. აქედან გამომდინარე, აწი როგორ განვითარდება სიტუაცია, არ ვიცი. არჩევნების წინ ასეთი მანევრები, რა თქმა უნდა პრორუსული ძალების წისქვილზე ასხამს წყალს. ახლა ისინი გამოვლენ და იტყვიან – აი, ჩვენ თუ არ დავალაგებთ რუსეთთან ურთიერთობას, თბილისსაც აიღებენ. ამიტომ ყოველი არჩევნების წინ რუსეთს ჰქონდა მცდელობა თავისი ძალები შეეყვანა პარლამენტში, რაც არ გამოსდიოდათ, თუმცა ამ არჩევნების წინ იდეალური მოედანი აქვთ შექმნილი და კარგადაც ფინანსდებიან. ასე რომ, ეს წვრთნები არის რაღაცის სამზადისი, თუმცა რისი, ამის პროგნოზი წინასწარ რთულია”, – მიიჩნევს გამოცემის კორესპონდენტთან საუბრისას პაატა დავითაია.