ამ მთლიან ისტორიაში, რომელიც დაიწყო ერთი უწყინარი ინიციატივით, რომელიც შეეხებოდა ჯანსაღი ცხოვრების წესის წახალისებას, სამწუხარო რეალობამდე მივედით. ჩემთვის პირადად ყველაზე სამწუხარო ის არის, რომ გიორგი გახარიამ, რომელიც იყო ამ ქვეყნის შს მინისტრი და პრემიერ-მინისტრი, უნდობლობა გამოუცხადა დამოუკიდებელ საექპერტო დაწესებულებას – სამხარაულის ექსპერტიზის ეროვნულ ბიუროს, – ამის შესახებ „ქართული ოცნების“ წევრმა, შალვა პაპუაშვილმა პარტიის ოფისში გამართულ ბრიფინგზე განაცხადა.
„მან ყველაზე კარგად იცის როგორც შს მინისტრმა და პრემიერ-მინისტრმა, რა ნიშნავს ეს ბიურო, რა როლი აქვს ამ ბიუროს, მათ შორის ამ ქვეყანაში გამოძიების წარმოებისთვის, რამდენად მნიშვნელოვანია ამ ინსტიტუტის მიმართ ნდობა და რამდენად არასახელმწიფოებრივია, როცა ის ცდილობს, ძირი გამოუთხაროს ამ ინსტიტუტის მიმართ ნდობას. დანარჩენი მნიშვნელოვანიც აღარაა“, – განაცხადა პაპუაშვილმა.