სომხეთის პრემიერ-მინისტრის, ნიკოლ ფაშინიანის განცხადებით, ქვეყნის წინაშე არსებული გამოწვევები კვლავ აქტუალურია და მათ საკმაოდ კონკრეტული ფორმა მიიღეს. ამის შესახებ პრემიერმა სამშაბათს, პარლამენტში 2025 წლის სახელმწიფო ბიუჯეტის შესრულების ყოველწლიური ანგარიშის განხილვისას განაცხადა.
ფაშინიანმა განსაკუთრებული ყურადღება გაამახვილა საარჩევნო პროცესების სიწმინდესა და შიდაპოლიტიკურ ლეგიტიმურობაზე.
„დღეს ჩვენ უნდა შევქმნათ გარანტიები იმისა, რომ ძალებს, რომლებიც ამომრჩევლის მოსყიდვით არიან დაკავებულნი, სომხეთში პოლიტიკური გავლენის მოპოვების არანაირი შანსი არ ჰქონდეთ“, – აღნიშნა მან.
მისივე თქმით, პარლამენტში წარმოდგენილი ამჟამინდელი ოპოზიცია სრულიად უკანონო საქმიანობის შედეგად ჩამოყალიბდა, რის გამოც სახელმწიფოს აქვს კანონიერი უფლება, მომავალში ამ წრეებს პოლიტიკური მოღვაწეობის შესაძლებლობა შეუზღუდოს.
მთავრობის მეთაურმა ისაუბრა იმ საგარეო წნეხზეც, რომელიც ქვეყანაში კრიმინალურ-ოლიგარქიული სისტემის აღმოფხვრის პროცესს ახლდა თან. ფაშინიანის განმარტებით, ამ პროცესებმა სომხეთის უსაფრთხოებას გარკვეული საფრთხეები შეუქმნა.
„იყო სიტუაციები, როდესაც მივუახლოვდით ზღვარს, რომლის გადაკვეთის შემდეგაც გავაცნობიერეთ, რომ მსგავსი ზეწოლის გაგრძელებას შესაძლოა გამოეწვია საპასუხო ქმედებები ეგზისტენციალური შედეგებით სომხეთისთვის“, – განაცხადა ფაშინიანმა.
თუმცა, პრემიერ-მინისტრმა იქვე დაამატა, რომ ამ დროისთვის აღნიშნული საფრთხეები და რისკები უკვე დაძლეულია და ისინი აღარ არსებობენ.