სამხრეთ კორეის პრეზიდენტმა ლი ჯე-მიონმა უკრაინა ორი ჩრდილოკორეელი სამხედრო ტყვესთვის სამხრეთ კორეაში გადაცემის შესახებ ინფორმაციის გასაჯაროებაში დაადანაშაულა.
როგორც მედია აღნიშნავს, კიევმა და სეულმა წინასწარ მიაღწიეს შეთანხმებას, რომ ჩრდილოეთ კორეელი სამხედროების გადაცემის შესახებ ინფორმაცია კონფიდენციალურად დარჩებოდა, რადგან მისმა გასაჯაროებამ შესაძლოა, ტყვეებისა და ჩრდილოეთ კორეაში დარჩენილი მათი ოჯახის წევრების უსაფრთხოებას საფრთხე შეუქმნას.
თუმცა, 23 სექტემბერს უკრაინის პრეზიდენტმა ვოლოდიმირ ზელენსკიმ გაეროს გენერალურ ასამბლეაზე გამოსვლისას განაცხადა, რომ უკრაინამ ორი ჩრდილოეთკორეელი სამხედრო ტყვე სამხრეთ კორეას გადასცა.
ლი ჯე-მიონმა განაცხადა, რომ მხარეებს კონფიდენციალურობის შეთანხმება ჰქონდათ და უკრაინის გადაწყვეტილებას, ინფორმაცია საჯაროდ გაემჟღავნებინა, „სამწუხარო“ უწოდა. მისი თქმით, საკითხი განსაკუთრებით მგრძნობიარეა და შესაძლოა გავლენა იქონიოს დიპლომატიაზე, ეროვნულ უსაფრთხოებასა და კორეის ნახევარკუნძულზე არსებულ ვითარებაზე.
უკრაინის პრეზიდენტის ოფისში კი განმარტეს, რომ გასაჯაროვდა მხოლოდ ტყვეების სამხრეთ კორეაში გადაყვანის ფაქტი და ოპერაციის დეტალები არ გამჟღავნებულა. უკრაინული მხარის განცხადებით, მათი სრული გადაცემის ფაქტის საიდუმლოდ დატოვება უცნაური იქნებოდა.
ორი ჩრდილოეთკორეელი სამხედრო უკრაინელმა ძალებმა 2025 წლის იანვარში, რუსეთის კურსკის ოლქში დაატყვევეს. ისინი რუსეთის მხარეს უკრაინის წინააღმდეგ საბრძოლველად გაგზავნილი ჩრდილოეთკორეელი სამხედროების შემადგენლობაში იმყოფებოდნენ.