ნაძალადევის რაიონში, რკინიგზის ქ. N14-ში მდებარე დევნილთა დასახლებაში სადარბაზოების რემონტი მიმდინარეობს. პროექტის ფარგლებში, კორპუსის ინფრასტრუქტურა 2 750 კვ.მ ფართობზე მოწესრიგდება. ბინათმესაკუთრეთა ამხანაგობების ხელშეწყობის პროგრამის ფარგლებში, მიმდინარე სამუშაოებს ნაძალადევის რაიონის გამგებელი ირაკლი ხელაძე თბილისის საკრებულოს მაჟორიტარ დეპუტატთან, დავით ჭელიძესთან ერთად გაეცნო. „სადარბაზოების რემონტის პარალელურად, ყველა სართულზე რკინის მოაჯირები ეწყობა. პროექტის დასრულების შემდეგ, ადგილობრივი მოსახლეობის საცხოვრებელი გარემო გაუმჯობესდება. ასევე, მიმდინარე წელს კორპუსის ეზო ლითონის ღობით შემოვსაზღვრეთ. გასულ წლებში კი გამგეობის დაფინანსებით, აღნიშნული შენობის გაზიფიცირება მოხდა. დასახლებაში 300-მდე დევნილი ცხოვრობს“, – განაცხადა ნაძალადევის რაიონის გამგებელმა. რკინიგზის ქ. N14-ში მიმდინარე ინფრასტრუქტურული სამუშაოებისთვის ნაძალადევის რაიონის გამგეობის ბიუჯეტიდან 54 776 ლარი გამოიყოფა.
