საპარლამენტო ფრაქცია „ქართული ოცნება – ძლიერი საქართველოსთვის“ წევრი ირაკლი აბუსერიძე, საკრებულოს წევრ ლევან დავითაშვილთან, ისნის რაიონის გამგებელ კახა ლაბუჩიძესა და საუბნო განყოფილების ხელმძღვანელ ხვიჩა ჩალაბაშვილთან ერთად, ვაზისუბანში მიმდინარე სარეაბილიტაციო სამუშაოებს გაეცნო.
ინფრასტრუქტურული პროექტების განახლება-აღდგენის ფარგლებში, ვაზისუბნის პირველ მიკრო რაიონში, №8 და №9 კორპუსების მიმდებარე ტერიტორიაზე, გზის რეაბილიტაცია დაიწყო. დაზიანებულ სავალ ნაწილზე მოეწყობა ახალი ტროტუარი და ასფალტის საფარი. საგზაო სამუშაოებისთვის ადგილობრივი ბიუჯეტიდან 97 013 ლარი გამოიყო. შანდორ პეტეფის ქუჩაზე, 157-ე სკოლის მიმდებარედ კი მოეწყობა კიბე და სკოლასთან მისასვლელი ბილიკი. გარდა ამისა, მე-4 მიკრო რაიონის მე-3 კვარტალში, №5 საცხოვრებელ კორპუსთან ეწყობა რკინაბეტონის კიბე.
ვაზისუბნის მეორე მიკრორაიონში, №6 კორპუსთან, მიმდინარეობს საბავშვო ბაღთან ასასვლელი კიბის რეკონსტრუქცია და ეზოს კეთილმოწყობა. მოსახლეობის თხოვნის საფუძველზე, განხორციელდება რამდენიმე ავტოფარეხის დემონტაჟი, რაც უზრუნველყოფს გარემოს იერსახის გალამაზებას.
„გვაქვს ამბიცია, რომ ჩვენი რაიონი გახდეს ერთ-ერთი გამორჩეული და საცხოვრებლად სასურველი. ამისთვის, პირველ რიგში, საჭიროა, მოგვარდეს ინფრასტრუქტურული პრობლემები. ამ პროცესებში დიდი როლი აქვს ადგილობრივი თვითმმართველობის ორგანოებს, რომლებთანაც კოორდინირებულად ვთანამშრომლობთ და ხალხთან მუდმივი კომუნიკაციის პირობებში ვახორციელებთ სხვადასხვა პროექტს, მუდმივ რეჟიმში ვეცნობით არსებულ ვითარებას და ვთანხმდებით სამომავლო გეგმებზე“, – განაცხადა დეპუტატმა, ირაკლი აბუსერიძემ.