„თიბისი ბანკის“ თანადამფუძნებლები მამუკა ხაზარაძე და ბადრი ჯაფარიძე ანაკლიის მმართველი საბჭოს თავმჯდომარისა და თავმჯდომარის მოადგილის თანამდებობეს ტოვებენ. ამის შესახებ მათ თბილისის საქალაქო სასამართლოში ჟურნალისტებთან განაცხადეს.
მამუკა ხაზარაძის და ბადრი ჯაფარიძის თქმით, ანაკლიის პროექტი მათთვის და ქვეყნისთვის უმნიშვნელოვანესი პროექტია. მამუკა ხაზარაძის განცხადებით, შემდეგ კვირაში ის და ბადრი ჯაფარიძე ანაკლიის მმართველ საბჭოში თანამდებობებს დატოვებენ, რათა დასრულდეს სპეკულაციები „თითქოს რაღაცას ეფარებიან“.
„ანაკლია არის სასიცოცხლოდ მნიშვნელოვანი პროექტი, ქვეყნის ეკონომიკის შემოტრიალება და ერთხელ და საბოლოოდ ევროპასა და აზიას შორის კარიბჭედ დაფიქსირება, ასევე მსხვილი ინვესტორების გაჩენა, რომლებთანაც ჩვენ თითქმის დამთავრებული გვქონდა მოლაპარაკება და 2 დღის წინ კიდევ ამ ქაოსში ჩაგვაგდეს. ეს არის ყოვლად გაუგებარი რამ. ერთი მხრივ მთავრობა ამბობს, რომ ანაკლიას მხარს უჭერს და მეორე მხრივ პირდაპირ, ღიად ებრძვიან ამ პროექტს. ის ზარალი, რაც ქართულ ეკონომიკას მათ მიაყენეს 2 დღის განმავლობაში 2 მილიონი ლარის სანაცვლოდ არის დანაშაული და დადგება დრო, რომ ისინი ამის გამო პასუხს აგებენ. აქედან გამომდინარე, მე და ბადრიმ გადავწყვიტეთ, რომ მომავალ კვირას ჩვენ გვექნება პრესკონფერენცია, შევცვლით ანაკლიის მმართველ საბჭოს და გადავიწევით უკანა პლანზე. მე ჩამოვშორდები თავმჯდომარეობას, ბადრი თავმჯდომარის მოადგილეობას, რათა ერთხელ და სამუდამოდ დამთავრდეს სპეკულაცია, თითქოს ჩვენ რაღაცას ვეფარებით“, – განაცხადა მამუკა ხაზარაძემ.