სავარაუდო ფარული ჩანაწერების თემას საპარლამენტო უმრავლესობის წევრი, ალუდა ღუდუშაური გამოეხმაურა.
მისი თქმით, ყველაფრის უკან ე.წ. დესტრუქციული ოპოზიცია დგას, რომლის წარმომადგენლებიც ხალხის მხარდაჭერის არქონის გამო, მსგავსი მეთოდებით ცდილობენ საზოგადოებისთვის თავის შეხსენებას.
„ყველას კარგად გვესმის, თუ ვისი ხელწერაა ეს ჩანაწერები, ეს არის პირდაპირ „ნაციონალური მოძრაობის“ დღის წესრიგი. მათ კარგად ესმით, რომ ხალხის მხარდაჭერა არ აქვთ და ცდილობენ უაღრესად ამაზრზენი და ამორალური კამპანიით, როგორიც არის ფარული ჩანაწერები, კვლავ შეახსენონ თავი ჩვენს ამომრჩეველს და საზოგადოებას“, – განაცხადა ალუდა ღუდუშაურმა.
ინტერნეტში სავარაუდო ფარული მიყურადების გზით პოლიტიკოსების, სასულიერო პირებისა და ჟურნალისტების მოსმენის თაობაზე მასალები გავრცელდა.
საქართველოს პროკურატურაში მედიასაშუალებების მიერ ფარულ ჩანაწერებთან დაკავშირებით გავრცელებულ ინფორმაციაზე გამოძიება დაიწყო.