გვიან, მაგრამ სამართალმა იზეიმა და ახლა მას უკვე შეუძლია, რომ პასუხი გასცეს როგორც დაზარალებულების ოჯახებს, ასევე, პროკურატურას და უფრო ფართოდ კი, ქართულ კანონს”, – ასე გამოეხმაურა კულტურის მინისტრი, თეა წულუკიანი მეგის ქარდავას განცხადებას.
როგორც იუსტიციის ყოფილმა მინისტრმა აღნიშნა, ქარდავას წერილმა შეუქმნა შთაბეჭდილება, რომ ის “ენაწყლიანი” ყოფილა.
“ძალიან ენაწყლიანი ყოფილა და ეს კარგია, მაგრამ უნდა გავიხსენოთ, თუ რა დაუშავა ბატონმა ქარდავამ ქართველ ხალხს, მოქალაქეებსა და პატიმრებს. ეს ყველაფერი ნათქვამია სტრასბურგის სასამართლოს გადაწყვეტილებებში“, – განაცხადა საქართველოს კულტურის მინისტრმა, თეა წულუკიანმა.
მისივე თქმით, ასევე, არსებობს ქართული სასამართლოს გადაწყვეტილებები, რომელთა მიხედვითაც, ის უკვე მსჯავრდებულია.
„ის წარდგენილია მართლმსაჯულების წინაშე, მართალია, ხანგრძლივი საექსტრადიციო პროცედურების შედეგად. მაინც კარგია, რომ გვიან, მაგრამ სამართალმა იზეიმა და ახლა მას უკვე შეუძლია, რომ პასუხი გასცეს როგორც დაზარალებულების ოჯახებს, ასევე პროკურატურას და უფრო ფართოდ კი, ქართულ კანონს“, – განაცხადა თეა წულუკიანმა.
საქართველოს თავდაცვის სამინისტროს სამხედრო პოლიციის დეპარტამენტის ყოფილი უფროსი, მეგის ქარდავა უკრაინაში 11 სექტემბერს დააკავეს, 18 სექტემბერს კი საქართველოში ექსტრადიცია განხორციელდა. საქართველოს პროკურატურა მეგის ქარდავას ექსტრადირებას მის წინააღმდეგ არსებული სისხლის სამართლის 11 საქმეზე ითხოვდა. გარკვეულ საქმეებზე ქარდავა დაუსწრებლად არის მსჯავრდებული, ხოლო დანარჩენი საქმეები არსებითად განიხილება შესაბამის სასამართლოებში.
რუსთავის მე-12 დაწესებულებიდან წერილი ქარდავამ გუშინ გაავრცელა.