“მთავარი პრობლემა, რაც ახლა თავდაცვის სამინისტროში იკვეთება და ყველა ხედავს, არის გაზრდილი ბიუროკრატიული აპარატი… ამ გაზრდილი კადრებითა და სოციალური დანახარჯებით თანდათან სოციალურ სააგენტოს ვემსგავსებით, რაც დაუშვებელია. თავდაცვის ბიუჯეტის 66% სწორედ ხელფასებსა და სოციალურ დანახარჯებზე მოდის, ეს მზარდი ტენდენციაა და საკითხი აშკარად გადასახედია. არადა, საზოგადოებას იმედი აქვს, რომ მის მიერ გადახდილი თანხები ქვეყნის თავდაცვიანობასა და უსაფრთხოებაზე იქნება დახარჯული, მე კი საზოგადოების წინაშე მაქვს ვალდებულება, რომ თანხები სწორედ ამ საქმეს მოხმარდეს. ჩემი მინისტრობის პირველი 100 დღის ფარგლებში კადრების ჭარბი რაოდენობა გამოვკვეთეთ, რომელთა ფუნქციის იდენტიფიცირება რთულია”, – აცხადებს თავდაცვის მინისტრი ლევან იზორია სამხედრო-ანალიტიკურ ჟურნალ “არსენალისთვის” (N12, დეკემბერი, 2016) მიცემულ ინტერვიუში, სათაურით ლევან იზორია: “თავდაცვის სამინისტრო თანდათან სოციალურ სააგენტოს დაამსგავსეს, მაგრამ ასე აღარ გაგრძელდება”.
“მაგალითისთვის გეტყვით, რიგი ტექნიკა მწყობრიდან არის გამოსული, არ გამოიყენება, მისი მომსახურე პერსონალი კი ხელფასს მაინც იღებს. ასეთი ადამიანები ძალიან ბევრია. მეტსაც გეტყვით, ზოგი მაღალი თანამდებობის პირი თავს უფლებას აძლევდა, თავდაცვის სამინისტროში გარკვეული ადამიანები გარკვეული ნიშნებით დაესაქმებინა – შესაძლოა, ახლობლები ყოფილიყვნენ ან სულაც თანაპარტიელები. ეს ტენდენცია შეინიშნებოდა ამ წლების განმავლობაში. ჩვენ ვამბობთ, რომ ბოლომდე აპოლიტიკურები, მიუკერძოებლები ვიქნებით ოპტიმიზაციისა და ზედმეტი ბიუროკრატიული შტატების შემცირებაში, რათა თანხები ერთი კონკრეტული მიზნისკენ იყოს მიმართული. არსებული პრობლემებიდან გამომდინარე, პრიორიტეტები სწორად უნდა დავსახოთ. როდესაც ოპტიმიზაციაზე ვლაპარაკობთ, ეს პროცესი, ცხადია, სამართლიანობას ითხოვს. სწორედ სამართლიანი კრიტერიუმებით უნდა მოხდეს იმის შეფასება, თუ რა კადრებია საჭირო. როდესაც ჭარბ თანამდებობებზე ვსაუბრობ, მათ შორის, უფროსი ოფიცრების, ვგულისხმობ იმასაც, რომ გარკვეული დეპარტამენტებისა და თანამდებობების რაოდენობა არასტანდარტულია, ანუ გადაჭარბებული, და ჩვენ ახლა ვცდილობთ, ეს სტანდარტებში მოვაქციოთ”, – აღნიშნავს გამოცემის კორესპონდენტთან საუბრისას ლევან იზორია.
“კონკრეტულად, გენშტაბის ფარგლებში იყოს სამი დეპარტამენტი, ხოლო მათ ფარგლებში კი სამი სამმართველო ან სამსახური. შესაბამისად, სტანდარტიზაცია მოგვცემს უფროსი ოფიცრების ოპტიმალურ რაოდენობას. ბოლო დროს ოფიცრების სიმრავლის გამო ერთგვარი პირამიდა მივიღეთ – ქვედა რგოლს დაწინაურების საშუალება არა აქვს. ადამიანები წლების განმავლობაში სწავლობენ ამერიკაში, მათ სწავლაში დიდი ინვესტიცია იდება, მართლაც მაღალკვალიფიციური კადრები არიან, მაგრამ როგორც კი საქართველოში იწყებენ მუშაობას, გული უცრუვდებათ, რადგან დაწინაურების შანსს ვერ ხედავენ და მოტივაცია ეკარგებათ. საკმაოდ კარგი განათლება აქვთ, სხვაგან მუშაობის პრობლემა არა აქვთ და მალევე იცვლიან პროფესიას. ჩვენ კი ვკარგავთ პროფესიონალებს… უფროსი ოფიცრების გადაჭარბებული მასა მათ კარიერის გაკეთების საშუალებას არ აძლევს. ასე რომ, `პირამიდის~ პრობლემა უნდა მოვაგვაროთ, მაგრამ სამართლიანობის პრინციპით“, – განაგრძობს თავდაცვის მინისტრი.
“ძალიან მკაცრად უნდა განისაზღვროს პროფესიონალური კრიტერიუმი, კომისიამ უნდა განსაზღვროს ვინ, რა კვალიფიკაციის, სტაჟისა და ასაკის ადამიანია საჭირო. ისეთი პოლკოვნიკებიც გვყავს, ვინც ასაკობრივი ზღვარი გადალახა, მაგრამ მაინც მსახურობს. არც ისინი მინდა გამომრჩეს, ვისაც მსახურების რამდენიმე თვე აქვს დარჩენილი… ასე რომ, მნიშვნელოვანია, ყველა, ვისაც ოპტიმიზაცია შეეხება, ასევე ისინიც, ვისაც თვეები აქვთ დარჩენილი მსახურების, კომპენსაციით გავუშვათ. თავდაცვის სამინისტროში ამ წელს შესაბამისი ბიუჯეტი მობილიზებულია და მომავალ წელსაც გათვალისწინებულია თანხები”, – დასძენს რესპონდენტი და შეკითხვას – “ოპტიმიზაცია, როგორც წესი, მტკივნეულად მიმდინარეობს...” – პასუხობს:
“დიახ, 2004 წელს სრულიად აპოლიტიკური ფიგურა – პოლიციის აკადემიის რექტორი, ვიყავი და მაშინაც სწორედ ასეთი ამოცანის წინაშე ვიდექი: ძველი “გაიშნიკები” უნდა გამეშვა, რათა ახალი თაობისთვის გზა გამეხსნა. მაშინაც მეუბნებოდნენ, რომ ამით ბევრ მტერს გავიჩენდი, მაგრამ დღეს ძალიან ვამაყობ, რომ არაკორუმპირებული ინსტიტუციის ჩამოყალიბებაში ჩემი წვლილი შევიტანე. ვერავინ დამისახელებს ჩემ მიერ მოყვანილ თუნდაც ერთ ადამიანს, რომელიც შეიარაღებულ ძალებში მსახურობს. როდესაც აქ მოვედი, ყველას ვუთხარი, მინდა თითოეულ ადამიანს ჰქონდეს განცდა, რომ მათზე სახელმწიფო ზრუნავს… შერჩევის საბჭოებმაც ობიექტურად უნდა იმოქმედონ – პირველი, რაც აქ მოსვლის შემდეგ გავაკეთეთ, შერჩევის საბჭოების მუშაობის მეთოდები გავაუქმეთ… ჩვენ ახლა მაქსიმალურად თანასწორუფლებიან პრინციპზე დაფუძნებულად უნდა ვიმუშაოთ, მნიშვნელოვანი თემაა ვაკანსიების გასაჯაროება. ადრე ამ ვაკანსიებზე ინფორმაცია მხოლოდ ორიოდე დღით ადრე თუ ხდებოდა ცნობილი, ახლა კი ვაკანსიებს ერთი თვით ადრე ვებგვერდზე ვაქვეყნებთ”.
“რაც შეეხება გაწვევას – ეს არის ერთ-ერთი ყველაზე მწვავე საკითხი და მინდა საზოგადოებას ნათლად განვუმარტო, რომ ჩემი წინამორბედის მიერ ეს საკითხი ასე იყო ფორმულირებული: აღარ განხორციელდეს სავალდებულო სამხედრო სამსახურში გაწვევა. დავიწყოთ იქიდან, რომ თუ ეს საკითხი ასე ძალიან აწუხებდა, შეეძლო უფრო ადრე, მისი დანიშვნის პირველივე დღეებში ეაქტიურა და არა წინასაარჩევნოდ. თუ მინისტრი ფიქრობს, როგორც თავად აღნიშნა, რომ წვევამდელი მონურ შრომას ეწევა და ეს სისტემა გასაუქმებელია, ეს ერთი წლის მერე კი არ უნდა გააუქმო, მაშინვე უნდა იაქტიურო და მხოლოდ თავდაცვის უწყების ფარგლებში კი არა, მთლიანად გაუქმებაზე უნდა იზრუნო. რაც შეეხება იმას, თუ რატომ არის გაწვევის აღდგენა აუცილებელი – პროფესიულ არმიაზე, ცხადია, უარს არ ვამბობთ, ის იქნება, მაგრამ საქმე ის არის, რომ პროფესიულ არმიას დიდი თანხები სჭირდება. თუ გადახედავთ სტრატეგიულ სამოქმედო გეგმას, რომელიც გამოქვეყნებული იყო, აღმოაჩენთ, რომ 2016 წლისთვის თავდაცვისთვის 880 მილიონი ლარი იყო გათვალისწინებული და როდესაც ეს რესურსი არა გაქვს, პროფესიული არმიის ყოლის ამბიცია წმინდა პოპულიზმია”, – დასძენს ლევან იზორია.