რუსეთის სრულმასშტაბური ომი უკრაინის წინააღმდეგ მესამე წლისთავს უახლოვდება, თუმცა ევროპა კვლავ ინარჩუნებს მნიშვნელოვან კავშირებს რუსეთთან ენერგეტიკულ სექტორში, – წერს ამერიკული გამოცემა Foreign Policy სტატიაში სათაურით ევროპა რაღაცნაირად კვლავ დამოკიდებულია რუსეთის ენერგეტიკაზე.
გამოცემა აღნიშნავს, რომ უნგრეთი და სლოვაკეთი არ არიან ერთადერთი ევროპაში, რომლებიც კვლავ რუსულ ენერგეტიკას ეყრდნობიან.
კერძოდ, საფრანგეთი, ავსტრია და ესპანეთი კვლავ უხდიან მნიშვნელოვან თანხებს რუსეთს.
პუბლიკაციის ავტორები აღიარებენ, რომ ევროკავშირის ქვეყნებმა და განსაკუთრებით გერმანიამ მართლაც ბევრი გააკეთეს რუსეთზე ენერგეტიკული დამოკიდებულების შესამცირებლად, მაგრამ ევროკავშირის ქვეყნები კვლავ ყიდულობენ ენერგომატარებლებს რუსეთიდან და ამით პირდაპირ იხდიან პუტინის სამხედრო ბიუჯეტში.
განსაკუთრებით მძიმე მდგომარეობაა თხევად ბუნებრივ აირთან დაკავშირებით. 2024 წელს ევროკავშირმა რუსეთიდან რეკორდული 16.5 მილიონი ტონა თხევადი ბუნებრივი აირი შემოიტანა. კერძოდ, 2024 წელს მისი იმპორტი რუსეთიდან გაზარდა საფრანგეთმა, ესპანეთმა, ნიდერლანდებმა და ბელგიამ.
პუბლიკაციის ავტორები ამას განმარტავენ არა ალტერნატივების არარსებობით, არამედ იაფფასიანი რუსული გაზით სარგებლობის სურვილით.
გარდა ამისა, რუსული ნავთობისგან მიღებული ნავთობპროდუქტები ხშირად შედის ევროკავშირში მესამე ქვეყნების გავლით. სტატისტიკის მიხედვით, 2024 წლის 9 თვის განმავლობაში ევროკავშირის ქვეყნებმა ინდოეთიდან, ჩინეთიდან და თურქეთიდან 12.3 მილიონი ტონა ნავთობპროდუქტი შემოიტანეს.
სტატიაში ასევე აღნიშნულია, რომ რუსეთი კვლავ რჩება ბირთვული საწვავია და ტექნოლოგიების დომინანტურ მიმწოდებლად ევროპის ატომური ენერგეტიკის დიდი ნაწილისთვის.