ვადევნებ თვალყურს საგამოძიებო კომისიის მუშაობას და აქ ორი ძირითადი მომენტი გამოიკვეთა, რისი პრეტენზიაც გვქონდა და დღესაც გვაქვს იმ ხელისუფლებასთან. ადამიანის უფლებების ევროპული სასამართლოს მიერ აღიარებული და დაცული ღირებულება, ეს არის ადამიანის ღირსების დაცულობა, ადამიანის სიცოცხლის დაცულობა და ამავე დროს, ადამიანის კერძო საკუთრების დაცულობა, რომელიც არის ხელშეუხებელი. სწორედ ამ ორი ღირებულების მასობრივმა შელახვამ გამოიწვია ის, რომ „ნაციონალური მოძრაობის“ მიმართ ჩამოყალიბდა ორსიტყვიანი შეფასება – სისხლიანი ცხრა წელი, – განაცხადა „დღის ქრონიკასთან“ „ერთიანი ნეიტრალური საქართველოს“ ერთ-ერთმა დამფუძნებელმა, ადვოკატმა გელა ნიკოლაიშვილმა პარლამენტის საგამოძოებო კომისიის სხდომებთან დაკავშირებით.
მისი თქმით, „ნაცმოძრაობის“ ხელისუფლების მხრიდან ადგილი ჰქონდა მასობრივ ძალადობას მოსახლეობაზე და ამის კარგი მაგალითია ყოფილი პოლიტპატიმარი გიორგი ზერეკიძე, რომელსაც კომისიამ დღეს მოუსმინა.
გელა ნიკოლაიშვილის განცხადებით, გიორგი ზერეკიძის საქმის მსგავსი ბერვი სხვაც იყო, თუმცა სხვადასხვა მიზეზის გამო არ გახმაურებულა.
„ეს იყო ფაქტობრივად არა მხოლოდ ციხეებში, არამედ გარეთაც, თავისუფლებაში მყოფი ადამიანებისთვის ის შოკური მდგომარეობა ფაქტობრივად, როდესაც ადამიანები მასობრივი მოსმენების თუ მასობრივი მუქარების გამო, იძულებული იყვნენ ტელეფონი ან მეორე ოთახში გაეტანათ ან საერთოდ დაეშალათ. კერძო საკუთრების წართმევაზე, რამდენიმე მაგალითი იყო. მათ შორის ჯემალ ლეონიძის მაგალითი, ხარძიანის მაგალითი, კიდევ სხვა მაგალითები და ალბათ კიდევ იქნება.
რაც შეეხება ციხეში და ღირსების შემლახველი მოპყრობის ფაქტებს, რომელიც ძალიან ხშირად მთავრდებოდა სიცოცხლის უფლების შელახვით, ჯანმრთელობის უფლების შელახვით, დაინვალიდებული ადამიანები მრავლად იყვნენ და დღეს ერთ-ერთი მაგალითი იყო სწორედ ზერეკიძის ჩვენება, რომელიც ჩვენ მოვისმინეთ. თვითონ გიორგიმაც თქვა ამ ჩვენების დროს დღეს, რომ „უბრალოდ ჩემი ფაქტი გახმაურდა და იმიტომ იცის საზოგადოებამო“, თორემ ამაზე უარესებიც შეიძლება ძალიან ბევრი იყო. მაგრამ ბევრი ერიდებოდა იმას, რომ გახმაურებულიყო. იმიტომ, რომ შეიძლება მათი ოჯახის წევრს დამუქრებოდა საფრთხე. შეიძლებოდა კი არა, აუცილებლად დაემუქრებოდა. და უფრო მეტიც, იმ ადამიანების ოჯახებს ემუქრებოდა საფრთხე, ვინც ამას ასაჩივრებდა სტრასბურგის სასამართლოში. ეს თვითონ გიორგის მაგალითზეც იყო და ეს მერე როგორი ტრაგედიით დასრულდა, ჯერ გასაჩივრება და შემდეგ ამ საჩივრის უკან გამოტანა მისი მშობლების მიერ და რანაირად მოხდა ის, რომ შეეწირა ამ ისტორიას მისი მამა 47 წლის ასაკში. არაერთი ასეთი ფაქტი იყო.
შემთხვევითი არ იყო ისიც, რომ იმ პერიოდში საქართველომ პირველი ადგილი დაიკავა მსოფლიოში პატიმრების რაოდენობით. 100 000 სულ მოსახლეზე. ევროპაში უდავო ლიდერები იყვნენ. და ასევე გარდაცვლილი პატიმრების რაოდენობით, ერთ წელიწადში 145 პატიმარი იყო გარდაცვლილი“, – განაცხადა გელა ნიკოლაიშვილმა.