სახელმწიფო უსაფრთხოების სამსახური ბრალდებულ ბიჭიკო პაიკიძეს უშუამდგომლებს, რომ ქვეყანაში, სადაც იგი იმყოფება, შესაბამისი მოწმობა გაიცეს, – განუცხადეს „იმედინიუსს“ სახელმწიფო უსაფრთხოების სამსახურში სახელმწიფოს კუთვნილი დიდი ოდენობით თანხის თაღლითურად დაუფლების საქმეზე ერთ-ერთი ბრალდებულის, ბიჭიკო პაიკიძის ადვოკატის ირმა ჭკადუას განცხადებასთან დაკავშირებით.
კერძოდ, ჭკადუას განცხადებით, ბიჭიკო პაიკიძეს საქართველოში ჩამოსვლის სურვილი აქვს და ვერ ჩამოდის იმის გამო, რომ პასპორტი აქვს გაუქმებული.
„რადგან ადვოკატი აცხადებს, რომ ბრალდებულ პაიკიძეს დაბრუნების სურვილი აქვს და ვერ ბრუნდება, ამაში ჩვენ დავეხმარებით – ვუშუამდგომლებთ, რომ იმ ქვეყანაში, სადაც თვითონ იმყოფება, მასზე გაიცეს შესაბამისი დასაბრუნებელი მოწმობა, შეუძლია ჩამოვიდეს და გამოცხადდეს საგამოძიებო ორგანოში”, – განუცხადეს სუს-ში „იმედინიუსს“.