ვანის საკრებულოში „ქართული ოცნების“ დეპუტატის, მიმალვაში მყოფ ბიჭიკო პაიკიძის დის, თათია პაიკიძის განცხადებით, როცა მისი ძმის წინააღმდეგ გამოძიება დაიწყო, ის ქვეყანაში ძალიან დიდი ხნის განმავლობაში იმყოფებოდა.
მისივე განმარტებით, პაიკიძე გამოძიების ეტაპზე საერთოდ არ გამოუკითხავთ.
„თუკი, რამე სახის გადაცდომა დადასტურდება, ამ გადაცდომაც ღირსეულად მივიღებთ. პასპორტი დაკარგა და მიმართა, ქვეყანაში, რომ ხარ და მაშინ რომ დაკარგო პასპორტი, ის არ გსიამოვნებს.
ბიჭიკო პაიკიძე არც ერთხელ არ ყოფილა გამოძიების ეტაპზე გამოკითხვაზე დაბარებული. მეორე საქმეზე არ მაქვს ინფორმაცია, მაგრამ როგორც ადვოკატმა განაცხადა, ბიჭიკო პაიკიძე მზად იყო, თანხა აენაზღაურებინა, დოკუმენტს ელოდებოდა“, – განაცხადა თათია პაიკიძემ.
კითხვაზე, გაიგო თუ არა მისმა ძმამ მის წინააღმდეგ დაწყებული გამოძიების შესახებ სუს-ის ყოფილი უფროსისგან, გრიგოლ ლილუაშვილისგან, პაიკიძემ უპასუხა, რომ „სასაცილო რაღაცები არ უნდა ჰკითხონ“.
„როცა გამოძიება დაიწყო, ბიჭიკო ქვეყანაში იმყოფებოდა, თანამშრომლებისგან გაიგო. ჩვენ თავიდან ბოლომდე ვთანამშრომლობთ გამოძიებასთან. დიდი ხანი მიდიოდა ეს ყველაფერი და ბიჭიკო პაიკიძე ქვეყანაში იმყოფებოდა მთელი ამ ხნის მანძილზე. ადამიანური ნაწილი გაითვალისწინეთ, მე ვარ მისი და, რომელსაც ჰყავს საუკეთესო ძმა, ყველა დეტალში დავადასტურებ, რომელსაც 3 მცირეწლოვანი შვილი ჰყავს და მე მყავს შვილი, რომელიც ჩემმა ძმამ გაზარდა და უყურებს ტელევიზორს, ჩემი ამ მდგომარეობაში ყურება არავისთვისაა სასიამოვნო”,- განაცხადა პაიკიძემ.
კითხვაზე, აქვს თუ არა მას გრიგოლ ლილუაშვილთან ახლო ურთიერთობა, კონკრეტული პასუხი არ გასცა.
„ძალიან ბევრ ადამიანთან მაქვს ურთიერთობა საქართველოში, მათ შორის, თქვენთანაც”,- განაცხადა პაიკიძემ.
კომპანია B.P. TRANS- ის მფლობელსა და ვანის საკრებულოში „ქართული ოცნების“ დეპუტატს, მიმალვაში მყოფ ბიჭიკო პაიკიძეს, ამავე კომპანიის დირექტორს, ვალერიან კვარაცხელიას და კიდევ 4 პირს – იოსებ ჭანჭალეიშვილს, როინ ფოფხაძეს, გიორგი კვახაძე და ირაკლი გალოგრეს აღკვეთის ღონისძიების სახით პატიმრობა შეეფარდა.
დაკავებულ 5 პირსა და ბიჭიკო პაიკიძეს სახელმწიფო უსაფრთხოების სამსახურში სახელმწიფოს კუთვნილი დიდი ოდენობით თანხის თაღლითურად დაუფლების, წინასწარი შეთანხმებით ჯგუფის მხრიდან თაღლითობაში დახმარების და ყალბი ოფიციალური დოკუმენტაციის დამზადება-გამოყენების ფაქტებზე ბრალდება გუშინ წარუდგინეს.
ცნობისთვის, ბრალდებულებს 2021 წლის ივნისიდან 2022 წლის სექტემბრის ჩათვლით განხორციელებულ ქმედებებს ედავებიან. კერძოდ, სახელმწიფო ტენდერის შესრულების პროცესში, ქუთაისი-ალპანა-მამისონის უღელტეხილის საავტომობილო გზის მონაკვეთისა და ონის მუნიციპალიტეტის არეალში სტიქიის შედეგად დაზიანებული ცალკეული მონაკვეთების ნაპირდამცავი სამუშაოების განხორციელებისას, შპს „B.P. TRANS“-ის 100% წილის მფლობელი ბიჭიკო პაიკიძე, ამავე კომპანიის დირექტორის ვალერიან კვარაცხელიას და კომპანიის თანამშრომლის, იოსებ ჭანჭალეიშვილის დახმარებით, აგრეთვე ტენდერის შესრულებაზე კონტროლის განმახორციელებელი საზოგადოების მენეჯერების – როინ ფოფხაძის, გიორგი კვახაძისა და ირაკლი გალოგრეს დახმარებით, ყალბი ოფიციალური დოკუმენტაციის შედგენა-გამოყენების გზით, მოტყუებით დაეუფლა საქართველოს რეგიონული განვითარებისა და ინფრასტრუქტურის სამინისტროს კუთვნილ თანხას – 4 184 249 ლარს, რამაც დიდი ოდენობით ზიანი გამოიწვია და არსებითად შეილახა სახელმწიფოს კანონიერი ინტერესები.
კომპანიის მფლობელს, ბიჭიკო პაიკიძეს ბრალდება დაუსწრებლად, საქართველოს სისხლის სამართლის კოდექსის 180-ე მუხლის მე-3 ნაწილის „ბ“ ქვეპუნქტით და 362-ე მუხლის მე-2 ნაწილის „ბ“ ქვეპუნქტით წარედგინა, რაც დიდი ოდენობით თანხის თაღლითურად დაუფლებასა და ყალბი ოფიციალური დოკუმენტების შედგენა-გამოყენებას გულისხმობს, რამაც მნიშვნელოვანი ზიანი გამოიწვია. აღნიშნული ქმედება სასჯელის სახედ და ზომად 9 წლამდე თავისუფლების აღკვეთას ითვალისწინებს.
კომპანიის დირექტორს ვალერიან კვარაცხელიას და კომპანიის თანამშრომელს იოსებ ჭანჭალეიშვილს, აგრეთვე ტენდერის შესრულებაზე კონტროლის განმახორციელებელი საზოგადოების მენეჯერებს – გიორგი კვახაძეს, როინ ფოფხაძესა და ირაკლი გალოგრეს ბრალდება საქართველოს სისხლის სამართლის კოდექსის 25,180-ე მუხლის მე-2 ნაწილის „ა“ და მე-3 ნაწილის „ბ“ ქვეპუნქტებით და 362-ე მუხლის მე-2 ნაწილის „ბ“ ქვეპუნქტით წარედგინა, რაც დიდი ოდენობით თანხის თაღლითობით დაუფლებაში დახმარებას გულისხმობს წინასწარი შეთანხმებით ჯგუფის მიერ და ყალბი ოფიციალური დოკუმენტების დამზადება-გამოყენებას, რამაც მნიშვნელოვანი ზიანი გამოიწვია. აღნიშნული ქმედება სასჯელის სახედ და ზომად 6-დან 9 წლამდე თავისუფლების აღკვეთას ითვალისწინებს.
ამასთან, ბიჭიკო პაიკიძეს კიდევ ერთ საქმეზე, რომელშიც მას განსაკუთრებით დიდი ოდენობით გადასახადისათვის განზრახ თავის არიდებას ედავებიან, აღკვეთის ღონისძიების სახით პატიმრობა შეეფარდა. პატიმრობა შეეფარდა იგივე ბრალდებით ერთ-ერთი კომპანიის დაკავებულ ხელმძღვანელს, თურქეთის მოქალაქესაც.