„ფედერალისტების” ერთ-ერთი ლიდერი, თამარ ჩერგოლეიშვილი, სოციალურ ქსელში გამოქვეყნებულ ვიდეოში საუბრობს ქუთაისში მდებარე მე-19 საუკუნის ტაძარზე, რომელიც, მისი თქმით, საბჭოთა კავშირის დაშლის შემდეგ კათოლიკეებს არ დაბრუნებიათ, ვინაიდან, მართლმადიდებელმა ეკლესიამ მიიტაცა.
ჩერგოლეიშვილი მიიჩნევს, რომ საზოგადოების ღირსების საკითხია, ყველა მოქალაქეს ჰქონდეს აღმსარებლობის თავისუფლება, რწმენის თავისუფლება, ლოცვის უფლება და სახელმწიფოს ღირსების საკითხია, რომ არსებული უსამართლობა გამოასწოროს.
„ახლა ვარ ქუთაისში, ჩემს უკან არის მე-19 საუკუნის კათოლიკური ტაძარი, ჩემს გვერდზე კი არის ძალიან ცნობილი და საამაყო კათოლიკე ქართველის, ზაქარია ფალიაშვილის სახლ-მუზეუმი. ზაქარია ფალიაშვილი რომ ცოცხალი ყოფილიყო, კათოლიკურ ტაძარში ლოცვას კათოლიკურად ვერ აღავლენდა იმიტომ, რომ ამ ტაძარს ასეთი ისტორია აქვს: მე-19 საუკუნეში აშენდა, მაგრამ 1939 წელს, ბოლშევიკებმა, კომუნისტებმა, წაართვეს ქართველ კათოლიკეებს ზუსტად ისევე, როგორც ქართველ მართლმადიდებლებს, თავიანთი ტაძრები და აუკრძალეს რწმენა. შემდეგ, როდესაც საბჭოთა კავშირი დაიშალა, ეს ტაძარი, როგორც მართლმადიდებლური დაუბრუნდათ, ისე კი არ დაბრუნებია 20 ათასამდე კათოლიკე ქართველს, რომელიც აქ, ქუთაისში ცხოვრობს, არამედ, დაიბრუნა, უფრო სწორად, მიიტაცა მართლმადიდებელმა ეკლესიამ და ჩემი აზრით, საზოგადოების ღირსების საკითხია, რომ ამ ქვეყანაში მცხოვრებ ყველა მოქალაქეს , ჩვენი საზოგადოების ყველა წევრს ჰქონდეს აღმსარებლობის თავისუფლება, რწმენის თავისუფლება, ლოცვის უფლება და ამას გარდა, ახორციელებდეს საკუთრების უფლებას იმაზე, რაც მისია. ჩემი აზრით, სახელმწიფოს ღირსების საკითხია, რომ ეს უსამართლობა გამოასწოროს მართლმადიდებელ ეკლესიასთან კონსულტაციით იქნება ეს თუ იმ ზომების მიღებით, რაც საჭიროა, რომ აქ მცხოვრებმა დაიბრუნონ აღმსარებლობის თავისუფლება და თავიანთი ქონება“, – აცხადებს თამარ ჩერგოლეიშვილი.