თურქეთის პრეზიდენტის სავარძლის დაკავება 6 კანდიდატს სურს. ერდოღანის გარდა (სამართლიანობისა და განვითარების პარტია) არჩევნებში მუჰარემ ინჯე (სახალხო რესპუბლიკური პარტია), მერალ აქშენერი (კარგი პარტია), სელაჰატინ დემირთაში (ხალხთა დემოკრატიის პარტია), თემელ ქარამოლაოღლუ (ბედნიერების პარტია) და დოღუ პერინჩეკი (სამშობლო) იღებენ მონაწილეობას.
რეჯეფ თაიდ ერდოღანს ძლიერ მეტოქეობას სახალხო რესპუბლიკური პარტიიდან მუჰარემ ინჯე უწევს. მის მხარდასაჭერად თურქეთის ქალაქ იზმირის ქუჩებში ასი ათასობით ადამიანი გამოვიდა.
54 წლის ინჯე პოლიტიკაში წასვლამდე ფიზიკის მასწავლებელი იყო. ის 2002 წლიდან პარლამენტის წევრია.
რაც შეეხება ერდოღანს, ის ქვეყნის სათავეში უკვე 15 წელია. აქედან 2003-2014 წლებში პრემიერმინისტრის, ხოლო 2014 წლიდან პრეზიდენტის თანამდებობა ეკავა. ამ ხსნის განმავლობაში გამართული არჩევნები მის სასარგებლოდ სრულდებოდა. ხვალ, ერდოღანი ამომრჩეველთა 50%-ზე მეტი მხარდაჭერის მოპოვებას შეეცდება, წინააღმდეგ შემთხვევაში მეორე ტური გარდაუვალი იქნება.
საპრეზიდენტო არჩევნებში გამარჯვების შემთხვევაში ერდოღანი პირობას დებს, რომ ქვეყანაში მოქმედი საგანგებო მდგომარეობა, რომელიც 2016 წლის სამხედრო გადატრიალების შემდეგ დაწესდა და არაერთხელ გახანგრძლივდა გადაიხედება.
თურქეთში საპრეზიდენტო და საპარლამენტო არჩევნები 2019 წლის ნოემბერში უნდა ჩატარებულიყო, თუმცა თარიღმა გადაიწია და ის 24 ივნისს დაინიშნა. გადაწყვეტილება 2017 წლის აპრილში საკონსტიტუციო ცვლილებებზე გამართული რეფერენდუმის შემდეგ გადაწყდა.
საკონსტიტუციო ცვლილებები საპარლამენტოდან საპრეზიდენტო რესპუბლიკაზე გადასვლას, პრემიერის თანამდებობის გაუქმებას, საპარლამენტო მანდატების რაოდენობის გაზრდას (550-დან 600-მდე) და უზენაესი სასამართლოს და პროკურორების კოლეგიის რეფორმირებას ითვალისწინებს.
ფართოვდება პრეზიდენტის უფლებამოსილებაც. ერდოღანის გამარჯვების შემთხვევაში ის ქვეყანას 2029 წლამდე უხელმძღვანელებს.