„შშმ პირებზე სექსუალური ძალადობა ხორციელდება“,-ამის შესახებ ინფორმაცია გაზეთ „პრაიმტაიმს“ დუშეთის პანსიონატის ბენეფიციარმა მიაწოდა.
როგორც გამოცემასთან საუბრისას ბენეფიციარმა განაცხადა, ხშირია როგორც ფიზიკური, ასევე ფსიქოლოგიური ძალადობაც.
„არიან ბენეფიციარები, რომლებიც, სხვებთან შედარებით, უფრო გავლენიანები არიან. მათ რაც არ უნდა დააშავონ, ადმინისტრაცია პასუხს არაფერზე სთხოვს. ისინი სარგებლობენ ყველანაირი პრივილეგიით იქნება ეს კვება, აბაზანით სარგებლობა თუ სხვა.
ერთ-ერთი ბენეფიციარი, არ მინდა სახელის დასახელება, როგორც დირექტორი, ისე გრძნობს თავს. ჩემთან არ გასდის მასეთები, მაგრამ შედარებით დაუცველ ბენეფიციარებზე ფიზიკურად ძალადობს.
საერთოდ, ძალადობა ჩვეულებრივი ამბავია არა მარტო აქ, არამედ სხვა პანსიონატებშიც.
მეტსაც გეტყვით, ამ ადამიანის მხრიდან ადგილი ჰქონდა სექსუალურ ძალადობასაც, მაგრამ ამაზე არავინ ლაპარაკობს. ადმინისტრაციამაც ყველაფერი კარგად იცის, მაგრამ მალავენ. არადა სექსუალური ძალადობა იყო, თანაც არაერთხელ. ის ადამიანი ვისზეც იძალადეს, იმდენად დაუცველია, რომ ხმას ვერ იღებს. სიმართლე რომც თქვას, არავინ დაუჯერებს, არადა სიმართლე აქ ყველამ იცის.
წინა დირექტორი, დაახლოებით ერთი წლის წინათ სწორედ ამ მიზეზის გამო გაათავისუფლეს, მაგრამ რეალურად აქ არაფერი შეცვლილა. ისევ „მაყურებლები“ მართავენ პანსიონატს. სახალხო დამცველის წარმომადგენლებიც იყვნენ მოსულები და მათაც აქვთ ინფორმაცია ამ ყველაფერზე, მაგრამ რეაგირება რა იქნება არ ვიცი“,-ამბობს გამოცემასთან საუბრისას რესპონდენტი, რომელიც დუშეთის შშმ პირთა პანსიონატის ბენეფიციარია და რომელმაც ვინაობის გამხელა არ ისურვა.
„პრაიმტაიმი“ ინფორმაციის გადასამოწმებლად პანსიონატის დირექტორს ვახტანგ თეთრაძეს დაუკავშირდა, რომელმაც პანსიონატში შშმ პირებზე ძალადობისა და დისკრიმინაციის ფაქტები კატეგორიულად უარყო.
„არც ადმინისტრაციის მხრიდან და არც ბენეფიციარების მხრიდან ძალადობის ფაქტები არ ფიქსირდება. ეს არის სრული აბსურდი. მსგავსი რამ ბუნებაში არ მომხდარა“,-აღნიშნა თეთრაძემ.
გამოცემისთვის მიცემულ ინტერვიუში დუშეთის შშმ პანსიონატში ძალადობის ფაქტები დაადასტურა სახალხო დამცველის მოადგილე ეკა სხილაძემ. მისი თქმით, ბენეფიციართა ცალკეული ჯგუფები მართლაც სარგებლობენ გარკვეული პრივილეგიებით.
„ მონიტორინგის შედეგად, დუშეთის ფილიალში გამოიკვეთა ბენეფიციართა ცალკეულ ჯგუფებს შორის ურთიერთდაპირისპირება. მონიტორინგის ჯგუფის წევრთან ინტერვიუს დროს ისინი ერთმანეთს სალანძღავი და მუქარის შემცველი სიტყვებით მოიხსენიებენ, ურთიერთძალადობის შემთხვევების აღწერისას იყენებენ გამოთქმებს: „ერთმანეთი სცემეს“, „ერთმანეთს თავების დაჭრით, ემუქრებოდნენ“, „ყელში უჭერდა ხელს და ძლივს გააგდებინეს“ და სხვა. ბენეფიციარები საკუთარ ფეთქებად ხასიათს არ მალავენ და შესაბამისად, არ გამორიცხავენ მორიგი კონფლიქტის შემთხვევაში, მათ ხელთ არსებული ყველა საშუალების გამოყენებას. ადმინისტრაციის მიერ „ძალადობის საპასუხოდ გატარებულ ღონისძიებების აღრიცხვის ჟურნალში“ რეგისტრირებული შემთხვევები, როგორც წესი, „კონფლიქტად“ ფასდება. ჟურნალი არ შეიცავს აღნიშული ფაქტების საპასუხოდ ადმინისტრაციის მიერ გატარებული ღონისძიებების აღწერას.
პანსიონატში დაფიქისრდა ბენეფიციარებს შორის ფიზიკური ძალადობის ფაქტი, რომლის საუძველზეც ერთ-ერთი ბენეფიციარის წინააღმდეგ სისხლის სამართლის საქმეც აღიძრა და ჩატარებული სასამართლო-სამედიინო ფსიქიატრიული ექსპერტიზის შემდეგ იგი იძულებით მკურნალობაზე გადაიყვანეს.
იყო ასევე შემთხვევა, როდესაც ბენეფიციარმა ურთიერთძალადობის დროს გამოიძახა პატრული, ფაქტს კი პერსონალი „კონფლიქტად“ აფასებს და შესაბამის ჟურნალში არ მიუთითებს. ერთხელაც მოხდა ბენეფიციარებს შორის ურთიერთძალადობის ფაქტი და ეტლებით შეხლა-შემოხლა. ასევე გამოვლინდა სავარაუდო ეკონომიური და ფსიქოლოგიური ძალადობის შემთხვევები“,-განაცხადა ეკა სხილაძემ.