სოციალური მედიის გიგანტმა (Facebook) ბავშვებს ნება დართო თავისი მშობლების საკრედიტო ბარათებით პლატფორმაზე თამაშებში ფული გადაეხადათ. ეს მაშინ, როდესაც მცირეწლოვნებზე პასუხისმგებელი ადამიანები საქმის კურსში არ იყვნენ. ამის შესახებ USA Today წერს.
გამოცემას ერთ-ერთი ასეთი ბავშვის მაგალითიც მოჰყავს და წერს, რომ 15 წლის მოზარდმა პლატფორმაზე ორკვირიანი თამაშისას $6,545 დახარჯა. მოთხოვნის მიუხედავად მათ ეს თანხა უკან არ დაუბრუნდათ.
27 იანვარს გასაჯაროვდა დოკუმენტები, სადაც განხილულია ისეთი თამაშები, რომელთაც თაღლითური სქემა აქვთ. გავრცელებულ დოკუმენტებში Angry Birds-სი და PetVille-ი არის ნახსენები. Facebook-ის შიდა დოკუმენტებში კი იკვეთება, რომ სოცქსელმა იცოდა ამის შესახებ, ბავშვებს კი წარმოდგენაც არ ჰქონდათ ფულს თუ ხარჯავდნენ.
მსგავსი შემთხვევების თავიდან ასარიდებლად Facebook-ს ჰქონდა გეგმა ყოველი საბანკო მოქმედებისას ანგარიშის მონაცემების თავიდან შევსება ყოფილიყო საჭირო, თუმცა სოციალური მედიის გიგანტს ეს ფუნქცია პლატფორმაზე არ აუმოქმედებია.
გასულ კვირას გავრცელდა ინფორმაცია, რომ Facebook-ი კომპიუტერული თამაშის მოყვარული ბავშვების მიერ, მშობლების საბანკო ბარათებიდან უნებართვოდ დახარჯულ თანხებზე არაფერს აკეთებს. სასამართლომ სოციალური მედიის გიგანტს (Facebook) იმ დოკუმენტების წარდგენა სთხოვა, სადაც ასახული იქნება თუ რა პოლიტიკა აქვს პლატფორმას ამ მიმართულებით.
Facebook-ის 15 წლიან ისტორიაში სოციალური ქსელი არაერთი გამოწვევის წინაშე დადგა. მათ შორის ყველაზე რეზონანსული Cambridge Analytica-სთან დაკავშირებული ისტორია იყო. ამ კომპანიამ არალეგალურად მიიღო წვდომა სოცქსელის 87 მილიონი მომხმარებლის მონაცემებზე, რომ ის პოლიტიკური რეკლამისთვის გამოეყენებინა.
ვრცელი სტატია იმის შესახებ, თუ რა ელის Facebook-ს 2019 წელს შეგიძლიათ ამ ბმულზე წაიკითხოთ.