ოპოზიციას ევალება, მოიპოვოს ის რეპუტაცია, რომ მას უსმენენ ახალგაზრდები. უნდა გაიხსნას დისკუსია, როგორ გაგრძელდეს აქციები, რადგან ახლა არავინ იღებს პასუხისმგებლობას, ახალგაზრდები დარბიან და ხან რას ამტვრევენ, ხან – რას, – ამის შესახებ „გირჩის“ წევრმა, იაგო ხვიჩიამ განაცხადა.
ხვიჩიას თქმით, ადამიანებმა უნდა იცოდნენ, ვის ენდობიან და ლიდერებისგან რას ელოდებიან.
„ გუშინდელი აქციის ყველა ნაწილი არ მომეწონა, მაგრამ არც კარებთან უაზრო ჯაჯგური. მგონი, ოპოზიციას ევალება, რაღაცნაირად მოიპოვოს ის რეპუტაცია, რომ მას უსმენენ ახალგაზრდები. იმისთვის, რომ ეს მოხდეს, მედიაში უნდა გაიხსნას დისკუსია, როგორ გაგრძელდეს აქციები, რადგან ახლა არავინ იღებს პასუხისმგებლობას, ახალგაზრდები დარბიან და ხან რას ამტვრევენ, ხან – რას. პასუხისმგებელი არავინ რომ არ იქნება, აღმოჩნდება, რომ ვიღაც ახალგაზრდებს მარტო ტოვებს მართლმსაჯულების წინააღმდეგ.
ჯაჯგურის წინააღმდეგ კი არ ვარ, უბრალოდ, ეს მართლა ჯაჯგური უნდა იყოს. პარლამენტის ერთ კარს რატომ ეჯაჯგურებიან, ნახეთ, რამდენი კარი და ფანჯარაა, თუ პარლამენტში შესვლა უნდათ. თუ ჯაჯგურზე მივდივართ, რატომ მხოლოდ პარლამენტი და არა სხვა შენობები? ამდენი ხალხია და გადანაწილდეს. თუ ჯაჯგურამდე მივდივართ, ხარისხიანად დავეჯაჯგუროთ. ეტაპებია გასავლელი და ეს ეტაპები გამოტოვებული გვაქვს“, – განაცხადა იაგო ხვიჩიამ.