პოლიტიკურმა პროცესმა კულისებში გადაინაცვლა და ღია, საჯარო პოლიტიკა მთლიანად ჩაანაცვლა კულისებმა. სწორედ ამ საფრთხის გამო შემოვიტანეთ ქართული კანონი. ის რომ ქართულია, სწორედ ამიტომ აქვს მას წინააღმდეგობა, – ამის შესახებ „დღის ქრონიკაში“ „ხალხის ძალის“ ერთ-ერთმა ლიდერმა, დეპუტატმა დიმიტრი ხუნდაძემ განაცხადა.
„ჩვენ, „ხალხის ძალა“ რომ დესტაბილიზაციის რისკებს ვხედავდით და ბევრი რამ არ მოგვწონდა, ვამბობდით ღიად, სწორედ ამიტომ ვუსვამდით არაერთ კითხვას ამერიკის ელჩს, არაერთი საკითხი გამოვიტანეთ კულისებიდან. პრაქტიკულად, პოლიტიკურმა პროცესმა კულისებში გადაინაცვლა და ღია, საჯარო პოლიტიკა მთლიანად ჩაანაცვლა კულისებმა. სწორედ ამ საფრთხის გამო შემოვიტანეთ ქართული კანონი. ის რომ ქართულია, სწორედ ამიტომ აქვს მას წინააღმდეგობა. ის რომ შინაარსშიც ქართულია, სწორედ ამიტომ იყო დაკვეთა, რომ არც წაეკითხათ და გაეპროტესტებინათ.
ერთ რამეში ვეთანხმდები ურსულა ფონ დერ ლაიენს, რომ ჩვენ გზაჯვარედინზე ვდგავართ. ერთ მხარეს არის ქვეყნის ინტერესები, რაზეც ჩვენმა წინაპრებმა იზრუნეს და სისხლიც კი დაღვარეს, თუ არა და უნდა შევასრულოთ დაკვეთა, რასაც პირდაპირ გვეუბნებიან: უნდა ვიდგეთ ცალ ფეხზე, გარედან უნდა გვიკარნახონ, რომელი კანონი მივიღოთ, როდის ჩავერთოთ ომში, როდის მივუერთდეთ სანქციებს და საკუთარი ქვეყნის ინტერესების დაცვის უფლებაც კი არ გვაქვს.
მე არ ვარ უიმედოდ და ველოდები, რომ ქართული საზოგადოება იქნება ხელისუფლების მხარდამჭერი ქვეყნის უსაფრთხოებისა და ინტერესების დაცვის გზაზე“, – აღნიშნა ხუნდაძემ.