მთავრობის ეფექტიანობით, მსოფლიო ბანკის წევრ ქვეყნებს შორის საქართველო 35-ე ადგილზე დაწინაურდა და ახალი ისტორიული მაქსიმუმი დააფიქსირა. ბუნებრივია, ეს მეტყველებს იმაზე, რომ ინსტიტუციური თვალსაზრისით ქვეყანა სწორად ვითარდება, – განაცხადა გადაცემაში „დღის ქრონიკა“ საქართველოს ფინანსთა მინისტრის მოადგილემ, მიხეილ დუნდუამ.
მისივე თქმით, ბოლო პერიოდში საქართველო მსოფლიოში ეკონომიკური ზრდის მახასიათებლებით გამორჩეული ქვეყანაა. ამაზე მეტყველებს ის რეიტინგები, რომელიც ავტორიტეტული შემფასებელი ორგანიზაციების მეშვეობით ქვეყნდება.
„ჩვენ როდესაც ობიექტურ ფაქტებზე დაფუძნებით გვსურს წინსვლა და ასეც უნდა მოხდეს, ბუნებრივია, უნდა დავეყრდნოთ პირუთვნელ საერთაშორისო შემფასებლებს, რომელსაც მაგალითად, მსოფლიო ბანკი ან „გლობალური მმართველობის ინდიკატორი“ იყენებს და აქვეყნებს შესაბამის კვლევებს.
როდესაც საქართველო არის მოწინავე და უსწრებს ევროკავშირის 10-ზე მეტ სახელმწიფოს სხვადასხვა მიმართულებით, კორუფციის კონტროლით, მთავრობის ეფექტიანობით არის გამორჩეული და ამას ადასტურებს მსოფლიო ბანკის ბოლო კვლევა, სადაც მთავრობის ეფექტიანობით საქართველო მსოფლიო ბანკის წევრ ქვეყნებს შორის 35-ე ადგილზე დაწინაურდა და ახალი ისტორიული მაქსიმუმი დააფიქსირა რამდენიმე საერთაშორისო შემფასებელი ორგანიზაციის შემაჯამებელ კვლევაში, ბუნებრივია, ეს მეტყველებს იმაზე, რომ ინსტიტუციური თვალსაზრისით ქვეყანა სწორად ვითარდება და არის თავსებადი ყველაზე უკეთ, ვიდრე ევროკავშირის კანდიდატი ნებისმიერი სხვა ქვეყანა და მათ შორის, ევროკავშირის ბევრ მოწინავე სახელმწიფოს უსწრებს. ეს ჩვენ გვაძლევს მკაფიო სიგნალს იმ მიმართულებით, რომ დასახული რეფორმები, ამოცანები, გეგმები, რომელსაც უძღვება მთავრობა, მიმდინარეობს სწორი მიმართულებით.
უნდა გავაძლიეროთ ძალისხმევა ინსტიტუციური ეფექტიანობის გასაუმჯობესებლად და უფრო მაღალ დონეზე ასაწევად. ფაქტობრივად, ეს საკითხები კონვერტირდება ეკონომიკურ ზრდაში, მცირდება უმუშევრობა და კიდევ უფრო მეტად უნდა შემცირდეს უმუშევრობა – შემდგომი 4-5 წლის განმავლობაში – 4%-მდე, საქართველოში უნდა შევამციროთ სიღარიბე და ქვეყანა უნდა გახდეს მაღალშემოსავლიანი. დარწმუნებული ვარ, 2030 წლისთვის ეს მოხერხდება. წლიდან წლამდე ჩვენ ამას დავინახავთ. რეალური ფაქტები და შეფასებები ერთმანეთთან თანხვედრაშია და საქართველო არის მოწინავე ინსტიტუციური განვითარების თვალსაზრისით“, – აღნიშნა დუნდუამ.
მსოფლიო ბანკმა Economist Intelligence Unit-ის ექსპერტიზის შედეგები გამოაქვეყნა. ბიუროკრატიის ინდექსი, რომელიც მსოფლიო მმართველობის ინდიკატორების მეთოდოლოგიით გადამუშავდა, ქმნის გლობალურ რეიტინგს მმართველობის ეფექტურობის მიმართულებით.
საქართველომ ბიუროკრატიის ინდექსის მიხედვით, შეფასების 100%-იანი სკალიდან 75% აიღო, რაც მისი ისტორიული მაქსიმუმია. მსოფლიო რეიტინგში საქართველო საუკეთესო სახელმწიფოებს შორის 20-ე, ხოლო ევროპაში 13-ე პოზიციაზე გავიდა.