ვიღაცების პოზიციაა, რომ „ქართული ოცნების“ პირობებში არ უნდა იქნას მიღებული კანდიდატობა, რასაც მე და ჩემი პარტია კატეგორიულად ვეწინააღმდეგებით, – ამის შესახებ „ლელოს“ ლიდერმა, მამუკა ხაზარაძემ განაცხადა.
მისივე თქმით, გერმანიის საგარეო საქმეთა მინისტრთან შეხვედრა იყო ძალიან საქმიანი, პირდაპირი და გულახდილი.
„გერმანია, ისევე, როგორც საფრანგეთი, არის საქართველოს სტრატეგიული პარტნიორი მთელი მისი ისტორიის განმავლობაში, განსაკუთრებით ბოლო 30 წლის განმავლობაში. მათ საკმაოდ სერიოზული და გადამწყვეტი პოზიცია შეუძლიათ მიიღონ ქვეყნის ასპირაციაში, რაც არის ევროკავშირის კანდიდატობის მიღება. პრობლემები ძალიან ბევრია. ბუნებრივია, საკითხი შეეხო 12 რეკომენდაციას, რომელიც, სამწუხაროდ, არ სრულდება. განწყობა არ იგრძნობა, რომ ეს მალე შესრულდება. ბუნებრივია, შევეხეთ სხვა საკითხებსაც.
ისტორიული მიზნის მისაღწევად მთელი ერი თუ არ გავერთიანდებით – არ აქვს მნიშვნელობა ხელისუფლება, ოპოზიცია, სამოქალაქო საზოგადოება, რიგითი მოქალაქეები და არ გადავდებთ ყველაფერს იმას, რაც ხელს გვიშლის, არ დავაყენებთ ჩვენი ქვეყნის ყველაზე სტრატეგიულ საკითხს უპირველეს ყოვლისა, ჩვენ გავუშვებთ ისტორიულ შანსს. ვინც არ უნდა იყოს ხელისუფლებაში, რომელ პარტიასაც არ უნდა ეკუთვნოდეს, თითოეულ მოქალაქეს, ყველას მოვუწოდებ, რომ მომავალი თაობა არ გვაპატიებს გაშვებულ შესაძლებლობას, რომელიც ჩვენ შეიძლება, მივიღოთ, თუ კანდდატის სტატუსი ვერ მივიღეთ წლის ბოლოს. ეს არის ნომერ პირველი ამოცანა. ჩემი პოზოცია პირდაპირია, ვიღაცების პოზიცია არის, რომ „ქართული ოცნების“ პირობებში არ უნდა იქნას მიღებული კანდიდატობა, რასაც მე და ჩემი პარტია კატეგორიულად ვეწინააღმდეგებით. ჩვენ ვსაუბრობთ ჩვენს ქვეყანაზე, სამშობლოზე, შესაბამისად ყველაფერი უნდა გავაკეთოთ, რათა კანდიდატობა მივიღოთ“, – განაცხადა მამუკა ხაზარაძემ.