ევროპარლამენტი სამოქალაქო თავისუფლებების, მართლმსაჯულებისა და საშინაო საქმეთა კომიტეტში საქართველოსა და კოსოვოს ვიზალიბერალიზაციის შესახებ გამართული კენჭისყრის შედეგებთან დაკავშირებით განცხადებას აქვეყნებს.
“სამოქალაქო თავისუფლებების, მართლმსაჯულებისა და საშინაო საქმეთა კომიტეტმა მხარი დაუჭირა საქართველოს და კოსოვოს მოქალაქეებისთვის შენგენის ზონაში უვიზოდ მოგზაურობის უფლების მინიჭების გეგმებს. კომიტეტმა სავიზო რეჟიმის გაუქმებას კოსოვოსთვის 25 ხმით 24-ის წინააღმდეგ დაუჭირა მხარი, ორმა თავი შეიკავა, საქართველოსთვის კი – 44 ხმით ხუთის წინააღმდეგ“, – აღნიშნულია ევროპარლამენტის ვებგვერდზე გამოქვეყნებულ განცხადებაში.
განცხადებაში ნათქვამია, რომ ევროკავშირსა და საქართველოს შორის ვიზალიბერალიზაციის დიალოგი 2012 წელს დაიწყო, 2015 წლის ბოლოსთვის კი, ევროკომისიამ დაასკვნა, რომ ქვეყანამ ყველა კრიტერიუმი დააკმაყოფილა.
ამასთან, აღნიშნულ საკანონმდებლო ინიციატივაზე მომხსენებელს, მარია გაბრიელს სჯერა, რომ სავიზო რეჟიმი გაუქმებას მნიშვნელოვანი ინსტრუმენტია ეკონომიკური და კულტურული ურთიერთობების გააქტიურებისა და პოლიტიკური დიალოგის გაძლიერებისთვის, მათ შორის ადამიანის უფლებებისა და ფუნდამენტური თვაისუფლებების თემებზე.
როგორც მარია გაბრიელი აღნიშნავს, ამის მიუხედავად, საჭიროა მეტი ძალისხმევა ისეთი სფეროებში, როგორიცაა მედიის თავისუფლება, სასამართლო სისტემის დამოუკიდებლობა, არჩევნების სამართლიანობა, ასევე ქალებისა და ეროვნული უმცირესობების წარმომადგენელთა მონაწილეობის გაზრდა.
ევროპარლამენტის კომიტეტმა მხარი დაუჭირა მოლაპარაკებების დაწყებას ევროკავშირის საბჭოსთან საქართველოს ვიზალიბერალიზაციის საკანონმდებლო ინიციატივაზე, შეთანხმების პირველივე მოსმენით მიღწევის მიზნით, ასევე დაამტკიცა მოლაპარაკებებში მონაწილე ჯგუფის შემადგენლობა.
რაც შეეხება კოსოვოს, ევროპარლამენტის წევრებმა მხარი არ დაუჭირეს საბჭოსთან მოლაპარაკებების დაწყებას. მას შემდეგ, რაც ევროპარლამენტი და ევროკავშირის საბჭო საკანონმდებლო ცვლილებებს დაამტკიცებს, ბიომეტრული პასპორტების მქონე ქართველები და კოსოვოელები ევროკავშირში ვიზის გარეშე, 180-დღიანი პერიოდის განმავლობაში, 90 დღით ყოფნას შეძლებენ.