“საზოგადოებისთვის ცნობილი სახეები არ უნდა ეწეოდნენ, ისინი უნდა იძლეოდნენ კარგ მაგალითს, მოწევა კი არ არის კარგი მაგალითი,”- ასე ხსნის გუგული მაღრაძე ფილმებში მოწევის კადრების აკრძალვის მოთხოვნას.
დეპუტატი ამბობს, რომ ინიციატივა კადრის სრულად დაფარვას არ გულისხმობს. მას ამის მაგალითად თურქული ფილმები მოჰყავს. ,,თურქებმა გააკეთეს ასე, სიგარეტის ადგილზე ტუჩთან არის ყვავილი. ეს შეიძლება ცოტა კომიკური იყოს, მაგრამ მეორეს მხრივ, არ აღძრავს დადებით დამოკიდებულებას სიგარეტის მწეველთა მიმართ სწორედ იმის გამო, რომ ცოტა სასაცილო შეიძლება იყოს და ირონიულიც. ჩემთვის უფრო მეტად მნიშვნელოვანია არ მოეწონოთ მონიკა ბელუჩის მიერ მოწეული სიგარეტი და არ მიბაძონ მას,“- დასძინა გუგული მაღრაძემ.
ფილმებში თამბაქოს მოწევის ამსახველი კადრები შეიძლება დაფარონ. ასეთი კადრების შემცველი ფილმები იმ დროს შეიძლება გავიდეს, როდესაც მოზარდები ტელევიზორს, სავარაუდოდ, არ უყურებენ.