თუ სასამართლო ხელისუფლებას გარე ძალები ჩაიგდებენ ხელში, მაშინ ჩავთვალოთ, რომ საკანონმდებლო ხელისუფლება და აღმასრულებელი ხელისუფლებაც, შესაძლებელია, რომ გარე ძალების პირდაპირ დაქვემდებარებაში აღმოჩნდეს, ამიტომაც არის, რომ განსაკუთრებული დარტყმები მიმდინარეობს მოსამართლეების მიმართ, განსაკუთრებით, უზენაესი სასამართლოს მოსამართლეების და საკონსტიტუციო სასამართლოს მოსამართლეების მიმართ, – განაცხადა „დღის ქრონიკასთან“ საუბრისას იურიდიული კომიტეტის თავმჯდომარემ არჩილ გორდულაძემ მოსამართლეების დასანქცირებასთან დაკავშირებით.
„ჩვენი ქვეყნის კონსტიტუციის მიხედვით, ზოგადად ხელისუფლება სამი შტოსგან არის შემდგარი – ეს არის საკანონმდებლო, აღმასრულებელი და სასამართლო ხელისუფლება. ჩვენ წლების განმავლობაში ვისმენდით და ვხედავდით თვალნათლივ როგორი დარტყმები მიმდინარეობდა სასამართლო სისტემის მიმართულებით და ეს არ არის შემთხვევითი. კონკრეტულ ძალებს ჰქონდათ და აქვთ სურვილი, რომ ხელში ჩაეგდოთ სასამართლო სისტემა, აღარ ყოფილიყო სისტემა დამოუკიდებელი, ემართათ და მაგალითად, ისეთი შედეგები დამდგარიყო, როგორც ვნახეთ, თუ სწორად მახსოვს თეთრიწყაროს მოსამართლის მიერ მიღებული გადაწყვეტილება 2024 წლის 26 ოქტომბრის არჩევნებთან დაკავშირებით, ე.წ. გაჟონილი ბიულეტენების თაობაზე როგორ იყო მიღებული.
ჩვენ ახლა მაგალითად ვიხილეთ, რომ დიდმა ბრიტანეთმა სანქციები დაუწესა ორ მოსამართლეს გონივრული ეჭვის საფუძველზე. სადმე სამართალი თუ არსებობს დაწერილი, დაუწერელი სამართალი, გონივრული ეჭვის საფუძველზე ადამიანების დასჯა არ ხდება. ასეთი რამე ჯერ არავის არ მოუფიქრებია და ზოგადად, დასავლური ცივილიზებული სამყარო დგას სამართლიანობაზე და სამართალზე, არსად არ შეიძლება რომ არ იყოს დასაბუთებული კონკრეტული ქმედება, რომელსაც შემდეგ მოჰყვება ხოლმე სანქცია“, – განაცხადა გორდულაძემ.
მისი თქმით, კონკრეტული მითითების გარეშე, კონკრეტული საფუძვლის გარეშე დასანქცირდნენ მოსამართლეები. დასანქცირებულ მოსამართლეებთან ერთად დაასანქცირეს სამართალდამცავები.
„ჩვენ გვახსოვს როგორ მივიდა კონკრეტული საელჩოს წარმომადგენელი ერთ-ერთ მოსამართლესთან და ახსნა-განმარტების მიცემა სთხოვა თუ მოსთხოვა სასამართლოში კონკრეტულ განხილულ საქმესთან დაკავშირებით. ეს არის ზუსტად ხელების ფათური და მცდელობა იმისა, რომ ჩამოინგრეს სასამართლო, სასამართლოს რეპუტაცია, ხალხს გაუქრეს ნდობა სასამართლო სისტემისადმი, რაც შემდეგ უკვე გამოიწვევს ქვეყნის ჩამორღვევის და ხელისუფლებაში იმ ნაცაგენტების მოსვლის მყარი საფუძვლის შექმნას. ეს ყველაფერი, რა თქმა უნდა, არ უნდა დაუშვას არც საკანონმდებლო, არც აღმასრულებელმა ხელისუფლებამ, არც ხალხმა“, – აღნიშნა გორდულაძემ.
გორდულაძემ ასევე განაცხადა, რომ ხელისუფლებამ ყოველთვის უნდა აღიმაღლოს ხმა, როდესაც მიღებული იქნება მსგავსი უსაფუძვლო გადაწყვეტილებები, სახეზე იქნება პირდაპირი შანტაჟი და ყველანაირი სამართლებრივი წესრიგის დარღვევა.
„ყველაფერი უნდა გავაკეთოთ იმისათვის, რომ ასეთ გადაწყვეტილებებს შევეწინააღმდეგოთ, ვამხილოთ და, რაც მთავარია, იქნება საკანონმდებლო ცვლილებები, თუ პრაქტიკაში განსახორციელებელი ცვლილებები, ყველაფრით უნდა იყოს უზრუნველყოფილი სასამართლოს დამოუკიდებლობა. დამოუკიდებელი სასამართლო – ეს არის ერთ-ერთი საფუძველი ქვეყნის სიძლიერისათვის, მათ შორის, ეკონომიკური განვითარებისთვის ჩვენს ქვეყანაში, ინვესტიციების შემოზიდვის, რაც საბოლოო ჯამში, რა თქმა უნდა, ჩვენი ქვეყნის წინსვლას უწყობს ხელს“, – განაცხადა გორდულაძემ.