ეკონომიკისა და მდგრადი განვითარების მინისტრმა, დიმიტრი ქუმსიშვილმა დღეს გამართულ ბრიფინგზე 16 მარტს გუდაურში მომხდარ შემთხვევაზე, რომლის დროსაც სათხილამურო ტრასაზე, საბაგიროს ავარიულად გაჩერების შედეგად, 11 ადამიანი დაშავდა, გამოძიების დასკვნა წარადგინა.
როგორც მინისტრმა განაცხადა, ადგილი ჰქონდა ადამიანურ შეცდომას, ის ქმედებები, რაც ოპერატორს საბაგიროს გაჩერების შემდეგ უნდა განეხორციელებინა, ვერ შეასრულა. მისივე ინფორმაციით, ოპერატორი ამჟამად ჩამოშორებულია ამ საქმიანობას.
მისივე თქმით, აღნიშნულ ფაქტთან დაკავშირებით, საკუთარი ნებით კიდევ ორმა პირმა ითხოვა სამსახურეობრივი მოვალეობის შეჩერება, რადგან ისინი გრძნობენ მორალურ პასუხისმგებლობას აღნიშნულთან დაკავშირებით.
“მოვიწვიეთ დამოუკიდებელი ექსპერტები, აქ იმყოფებიან „ბიურო ვერიტასის“ ექსპერტული ჯგუფი, ასევე მწარმოებელი კომპანია „დოპელმაიერის“ წარმომადგენლობა. საგამოძიებო პროცესში ყველა ოფიციალური სტრუქტურა ერთობლივად იყო ჩარეული იმ საგამოძიებო პროცესში, რომელიც აქამდე მიმდინარეობდა. დადასტურებით შემიძლია ვთქვა, რომ საბაგირო აბსოლუტურად გამართული იყო, მისი მომსახურება ჩატარებული იყო სწორად. მოწყობილობაში ჩამონტაჟებული მეხსიერების ამოღების შედეგად დადგინდა, რომ 16 მარტს იყო ძაბვის ვარდნა, რამაც გამოიწვია საბაგიროს გაჩერება. თუმცა გაჩერების შემდეგ, ოპერატორს უნდა ემოქმედა გარკვეული თანმიმდევრობით და უნდა მომხდარიყო საბაგიროს გადაყვანა დიზელ-გენერატორზე და შემდგომში იქ მყოფი ტურისტების მიყვანა იმ წერტილამდე, საიდანაც ისინი ჩამოვიდნენ. დღეს არსებული დასკვნის საფუძველზე, სამწუხაროდ, ოპერატორმა დაუშვა შეცდომა. ქმედებათა ერთობლიობა, რომელიც მან განახორციელა, არ იყო თანმიმდევრული. ეს იყო ადამიანური შეცდომის ფაქტორი. დასკვნა გადაეცემა შს სამინისტროს, რომელიც დააყენებს შესაბამის პასუხისმგებლობას. ეს ოპერატორი ჩამოშორებულია საქმიანობას, გარდა ამისა, ორმა ადამიანმა მომმართა იმისათვის, რომ შეჩერებულიყო მათი მოვალეობებიც, ესენი არიან მთის კურორტების სააგენტოს დირექტორის მოადგილე ტექნიკურ დარგში და გუდაურის მთის მართვის დეპარტამენტის უფროსი, ისინი გრძნობენ მორალურ პასუხისმგებლობას აღნიშნულ ფაქტზე”,-განაცხადა დიმიტრი ქუმსიშვილმა.
შეგახსენებთ, რომ 16 მარტს გუდაურში, სათხილამურო ტრასაზე, საბაგირო ავარიულად გაჩერდა და უკუსვლით ამოძრავდა, რის შედეგადაც, წინასწარი მონაცემებით, 11 მოქალაქე დაშავდა.