მონღოლეთის ხელისუფლებამ ქვეყანაში ოფიციალური ვიზიტით მყოფი რუსეთის პრეზიდენტი ვლადიმერ პუტინი სისხლის სამართლის საერთაშორისო სასამართლოს მიერ გაცემული ორდერის საფუძველზე მხოლოდ იმის გამო არ დააკავა, რომ ეს აზიური ქვეყანა ძალიან არის დამოკიდებული ენერგომატარებლების იმპორტზე. ინფორმაციას Politico ავრცელებს.
„მონღოლეთში ნავთობპროდუქტების 95% და ელექტროენერგიის 20%-ზე მეტი იმპორტირებულია. ჩვენ ამას ჩვენი უახლოესი მეზობლებისგან ვყიდულობთ. ამ მიწოდებას სასიცოცხლო მნიშვნელობა აქვს ჩვენი და ჩვენი ხალხის ცხოვრების უზრუნველსაყოფად“, – ციტირებს Politico მონღოლეთს მთავრობის ერთ-ერთ წარმომადგენელს.
მთავრობის წარმომადგენელმა აგრეთვე დასძინა, რომ მონღოლეთი საერთაშორისო დიპლომატიურ დონეზე მუდამ ნეიტრალიტეტის პოლიტიკას ატარებდა.
მისი თქმით, მონღოლეთი დიდი ქვეყანაა 3,3 მილიონიანი მოსახლეობით. გეოგრაფიულად ის მოუხერხებელ ადგილას არის განლაგებული, ჩინეთსა და რუსეთს შორის. მას ზღვაზე გასასვლელი არ აქვს. ქვეყანა დიდი ხანია დანის პირზე დადის, რათა არცერთ მეზობელთან ურთიერთობა არ გაიფუჭოს. იგივე მიდგომა რუსეთის უკრაინაში შეჭრის შემდეგაც შენარჩუნდა.
რუსეთის პრეზიდენტის დაპატიმრების ორდერი ჰააგის სისხლს სამართლის საერთაშორისო სასამართლომ 2023 წელს გასცა. პუტინი ეჭვმიტანილია სამხედრო დანაშაულების ჩადენაში. კერძოდ კი რუსეთის მიერ ოკუპირებული უკრაინული ტერიტორიებიდან უკრაინის მოქალაქეთა, კონკრეტულად კი ბავშვების დეპორტაციაში. მექსიკა სისხლის სამართლის საერთაშორისო სასამართლოს იურისდიქციას ცნობს.