“არანაირი საფუძველი არ არსებობს, რომ თამაზ მეჭიაურს თავისი მოსაზრებების გამო სხვა პოლიტიკური ძალის წარმომადგენლებმა პოლიტიკური გარჩევები და თან პარტიის ხელმძღვანელობას მიუთითონ, როგორ მოიქცნენ. ეს სწორი არ მგონია. პარტია “ქართული ოცნება” იმსჯელებს ყველა საკითხზე, რასაც საჭიროდ ჩათვლის. კონკრეტულად ეს საკითხი კი არ მგონია, განსაკუთრებული სამსჯელო იყო. მადლობა უფალს, ჩვენ დღეს იმ ქვეყანაში ვცხოვრობთ, სადაც ნებისმიერ ადამიანს საკუთარი აზრის გამოთქმის უფლება აქვს და ამას აკეთებს. მით უფრო, პარლამენტის წევრს ვინ წაართვა აზრის გამოთქმის საშუალება?”, – აცხადებს “ქართული ოცნების” წევრი დავით ლორთქიფანიძე გაზეთ “რეზონანსისთვის” მიცემულ ინტერვიუში, სათაურითდავით ლორთქიფანიძე: ბერძენიშვილმა მეჭიაურს ბოდიში უნდა მოუხადოს / “ან ემოციას აჰყვა, ან ცოტა ზედმეტებშია გადასული”.
“ყველა იმ ღონისძიებას, საერთაშორისო აქტორების ჩართულობით, რომელიც ჩვენი ქვეყნის კიდევ უფრო ევროპული ორიენტაციისკენ და ჩვენი ქვეყნის სიძლიერისკენაა მიმართული, მხარს ვუჭერ. ხოლო იმ აზრს, რომ ამან რაღაც ფორმით საფრთხე გამოიწვიოს, არსებობის უფლება აქვს. ჩვენ საუკუნეებია, ამ გეოპოლიტიკურ არეალში ვართ და ვიცით, თუ რა მდგომარეობაშია ჩვენი ქვეყანა. თბილისიდან ნახევარი საათის განმავლობაში უცხო ქვეყნის ჯარები დგას და ამდენად საფრთხეზე მოსაზრებას აქვს არსებობის უფლება. პარტიის კურსი პროდასავლურია და გახსნილი პოლიტიკური ძალა ვართ, ამიტომ დისკუსია და განსხვავებული აზრი მიღებული ფორმაა და ზუსტად ამაში გამოიხატება ჩვენი ევროპისკენ ორიენტირებაც. ერთი მოსაზრების გამტარებელი რომ ვიყოთ, ვფიქრობ, ეს ევროპული გზა არ იქნებოდა”, – აღნიშნავს გამოცემის კორესპონდენტთან საუბრისას დავით ლორთქიფანიძე და შეკითხვას – “ლევან ბერძენიშვილმა თქვა, თუ ბატონი მეჭიაური ვინმეს რუპორია ნატო-სთან მიმართებაში, მაშინ ისიც მასავით “გონებაშეზღუდული, ბნელი მტერია” ქართველი ხალხის ნებისა, ვინც უნდა იყოსო” – პასუხობს”
“ვფიქრობ, რომ ლევან ბერძენიშვილი ან ემოციას აჰყვა, ან ცოტა ზედმეტებშია გადასული. მან თამაზ მეჭიაურთან მიმართებაში ელემენტარული ეთიკის ნორმები არ უნდა დაარღვიოს. აქ კი მეჭიაურს ის აპრიორი გონებაშეზღუდულს უწოდებს, რის გამოც მან თამაზს ბოდიში უნდა მოუხადოს, დანარჩენი კი, შემდეგ არკვიონ, ვინ ვისი რუპორია… კატეგორიულად ვერ გავიზიარებ მოსაზრებას, რომ ივანიშვილი აძლევდეს მეჭიაურს მითითებებს. ბატონ ბიძინას ძალიან ახლოს ვიცნობ და მინდა დაგარწმუნოთ, რომ ივანიშვილი არ არის ის კაცი, ვინმეს ამგვარი დავალება მისცეს”.
“ლევან ბერძენიშვილიც არ არის შეზღუდული, აზრი გამოთქვას, მაგრამ როდესაც საქმე მთავრობის წევრებს ეხება, ძალიან უხერხულია, როდესაც მთავრობის ზოგიერთი მინისტრი განსხვავებულ პოზიციას აფიქსირებს და პრემიერს აკრიტიკებს. ზაქარეიშვილმა თქვა, რომ მას მეჭიაური, როგორც ადამიანი, არ აინტერესებს, მაგრამ მეჭიაურის გამონათქვამზე “ქართული ოცნება” განცხადებას რატომ არ აკეთებსო. კოლეგაზე, პარლამენტის წევრზე ასეთი ტერმინოლოგიით საუბარი არ შეიძლება. როდესაც მინისტრი აკრიტიკებს მმართველ ძალას, მას უნდა ახსოვდეს, რომ ჩვენი მხრიდან ქვეყნის სტრატეგიულ კურსზე განცხადება არაერთხელ გაკეთებულა და ხელისუფლების კურსთან მიმართებაში მას კითხვები არ უნდა ჰქონდეს. თუმცავფიქრობ, რომ პარტიული ვექტორი მიმართულია მეჭიაურის, თოფაძისა და ჯაჭვლიანის წინააღმდეგ და სხვა პოლიტიკური ძალის წარმომადგენლების მიერ მათ მიმართ გაკეთებულ განცხადებებს რადიკალურად ვემიჯნები”, – განაგრძობს რესპონდენტი.
“რაც შეეხება მეჭიაურის პარტიიდან გარიცხვის მოთხოვნას – ვთვლი, რომ ეს არის ლევან ბერძენიშვილის პოზიცია და არა პარტიის. თუ რესპუბლიკური პარტიის უმაღლესი ორგანოც ამ მოსაზრებას გაიზიარებს, მაშინ ეს უკვე იქნება პარტიებს შორის დაპირისპირება. კაბინეტის წევრი მინისტრების ამგვარი განცხადებები ძალიან უხერხულია. აქ ორი გზაა, პირველი ისაა, რომ “რესპუბლიკელებმა” თავად უნდა მიიღონ გადაწყვეტილება, მეორე გზაა, რომ პრემიერმა. ეს პრემიერის გადასაწყვეტია. როდესაც ბატონი კვირიკაშვილი პრემიერად მოვიდა, ვთქვი, რომ საკადრო ცვლილებები იქნებოდა. ხელმძღვანელს უნდა ემუშავებოდეს საკუთარ გუნდთან. პრემიერი მინისტრებთან კომფორტულად უნდა გრძნობდეს თავს, ამიტომ საკადრო ცვლილებები გარდაუვალია… პარტიის დასავლურ კურსზე საუბარი კოლეგებთან არ მქონია. ამ კვირაში სხდომები გვაქვს და იქ მეტი საშუალება იქნება, ამ თემებზე ვიმსჯელოთ. თუმცა ყველა დეპუტატს აქვს საკუთარი აზრის გამოხატვის უფლება” – დასძენს ლორთქიფანიძე.
“ვფიქრობ, ერთი მხრივ “რესპუბლიკელებისა” და მეორე მხრივ მეჭიაურისა და პრემიერის დაპირისპირებაკიდევ უფრი გაღრმავდება, იმიტომ, რომ ბერძენიშვილების მხრიდან აგრესიულ გამოსვლებს ვხედავ და ისინი ამას გააგრძელებენ. ეს რადიკალური განცხადებები რესპუბლიკურ პარტიას ამომრჩევლის სიმპათიას არ შემატებს. არჩევნებში “რესპუბლიკური პარტია” რამდენ პროცენტს აიღებს, ამის სპეციალისტი არ ვარ, თუმცა 5 თვეა დარჩენილი და ყველაფერს ვნახავთ.ვფიქრობ, ქართველი ამომრჩეველი სწორ გადაწყვეტილებას მიიღებს”, მიიჩნევს ლორთქიფანიძე.