საქართველოს მწარმოებელთა ასოციაციის ხელმძღვანლის, ლევან სილაგავას განცხადებით, ხორბლის იმპორტის სუბსიდირება სასწრაფო იძულებითი ნაბიჯია ფასების შესანარჩუნებლად და ეს სწორი გადაწყვეტილებაა.
სილაგავას განმარტებით, ხორბლის უმსხვილესმა მწარმოებლებმა ამ პროდუქტის ექსპორტზე მთელი რიგი შეზღუდვები დააწესეს, საქართველო კი იმპორტზე დამოკიდებული ქვეყანაა. სილაგავას თქმით, საყოველთაო მოხმარების ეს ძირითადი პროდუქტი რომ არ გაძვირდეს, სუბსიდირება აუცილებელი იყო.
ხორბლის სუბსიდირებას მხარს უჭერენ მეპურეთა ასოციაციაშიც. ორგანიზაციის ხელმძღვანლის, მალხაზ დოლიძის მოსაზრებით, კორონავირუსის პანდემიის გამო იყო საშიშროება, რომ ხორბალი, შესაბამისად, ფქვილი და საბოლოო პროდუქტი – პური გაძვირდებოდა, თუმცა სუბსიდირებამ ეს პრობლემა, დიდწილად, დღის წესრიგიდან მოხსნა.
დოლიძის განცხადებით, პურის ფასის შენარჩუნებაში მნიშვნელოვან წვლილს შეიტანს საქართველოს მთავრობასა და „სოკარს“ შორის მიღწეული შეთანხმებაც, რომლის მიხედვითაც პურის ქარხნებსა და საცხობებს ბუნებრივი აირის სამომხმარებლო ტარიფი 86 თეთრიდან 76 თეთრამდე უმცირდებათ.
შეგახსენებთ, რომ საქართველოს მთავრობამ ხორბლის იმპორტის სუბსიდირების სახელმწიფო პროგრამა დაამტკიცა. პროგრამის ბენეფიციარი ვალდებულია, პროგრამის ფარგლებში იმპორტირებული ხორბლის გადამუშავების შედეგად მიღებული-მისაღები შესაბამისი მოცულობის პირველი ხარისხის ფქვილის რეალიზაცია განახორციელოს ერთ 50 კგ-იან ტომარაზე, არაუმეტეს, 51 ლარად, სუბსიდირების ხელშეკრულების გაფორმების თარიღიდან არაუგვიანეს მომდევნო სამი თვის განმავლობაში.
სუბსიდიის მოცულობა შეადგენს ერთ ტონა ხორბალზე არაუმეტეს 40 აშშ დოლარის ეკვივალენტს ეროვნულ ვალუტაში; პროგრამის ფარგლებში, ერთ ბენეფიციარზე სუბსიდია განხორციელდება არანაკლებ 2 000 და არაუმეტეს 40 000 ტონა მოცულობის ხორბალზე.