როცა ადამიანი ერთი ქვეყნის ტერიტორიაზე არის და შემდეგ უცებ აღმოჩნდება სხვა ქვეყნის ტერიტორიაზე, ცხადია, კითხვები ყოველთვის არის და გამოძიება მუშაობს იმაზე, რომ ყველა ამ კითხვას გაეცეს პასუხი, – ამის შესახებ ოკუპირებული ტერიტორიებიდან იძულებით გადადგილებულ პირთა დევნილთა და განსახლების მინისტრმა სოზარ სუბარმა განაცხადა.
“მუხტარლის მიმართ თუ დევნა იყო, მას შეეძლო მოემართა ჩვენი სამინისტროსთვის და მოეთხოვა თავშესაფარი. საქართველოში თბილისში არის ამიერკავკასიის გაერო-ს ლტოლვილთა უმაღლესი კომისარიატი და მიემართა მათთვის. იმ შემთხვევაშიც კი, თუ მის ოჯახს ჩვენს მიმართ ჰქონდა ეჭვები, გაერო-ს ლტოლვილთა უმაღლესი კომისარიატი არის ორგანო, რომელიც არ ითვალისწინებს არანაირ ხათრებს რომელიმე ქვეყნის მიმართ. ის აუცილებლად მიიღებდა თავშესაფარს, ლტოლვის სტატუსს ან საქართველოში, ან რომელიმე სხვა ქვეყანაში, თუკი დადასტურდებოდა, რომ მის მიმართ იყო დევნა. მას ორი წლის განმავლობაში არ მოუმართავს არც ჩვენთვის არც გაერო-ს ლტოლვილთა უმაღლესი კომისარიატისთვის, ეს მაფიქრებინებს, რომ მსგავსი დევნა არ არსებობდა”, – განაცხადა სუბარმა.